Импетигото е заразна инфекција на кожата која најмногу ги погаѓа бебињата и децата. Неретко, првите симптоми на болеста се појавуваат на лицето, особено во подрачјето на носот или устата, во форма на меурчиња кои подоцна пукаат, се навлажнуваат и се претвораат во краста. Болеста може да помине сама од себе, но антибиотиците може да спречат понатамошно ширење на болеста.
Болното дете додека е заразно треба да се изолира, што најчесто е 24 до 48 часа по почетокот на земање на антибиотици. Без земање на антибиотици, импетигото е заразно додека крастите не се исушат.
Вообичаени симптоми се меурчиња или групи на меурчиња кои многу брзо пукаат, тогаш во наредните неколку дена се навлажнуваат, и на заразеното место се создаваат красти со златна боја. Инфекцијата се шири по рабовите, а нови инфицирани места може да се појават и на други делови од телото.
Импетиго предизвикуваат една од двете бактерии: стрептокока од групата А (предизвикува блага форма на болеста) или стафилокока ауреус (предизвикува потешка форма кога може да се развие поголема количина на течност во меурчињата и тие подолго остануваат на кожата без да пукнат).
Децата со изиритирана кожа или повреди на неа имаат поголема можност да заболат од импетиго. Заразениот дел може, но и не мора, да чеша, а чешањето да ја прошири заразата. Се појавува и течење на нос.
Се пренесува од заразено на здраво дете со допир, но и облека, постелнина, пешкири, па дури и преку играчки.
Од оваа болест може да заболи секој, но најчеста е меѓу децата на возраст од 2 до 6 години. Инфекцијата е најчеста во летниот период.
