ПИШУВА:
Катерина Шекеровска-Димовска
katerina@pedijatar.mk
Од 12 до 14 септември 2025 година, во хотелот „DoubleTree by Hilton“ во Скопје, ќе се одржи седмиот симпозиум на Македонското здружение за алергологија и клиничка имунологија (МЗАКИ), насловен „Новини во алергологијата и клиничката имунологија 2025“. Симпозиумот, кој претставува значајна платформа за размена на најнови научни и стручни сознанија, оваа година се одржува во проширен формат – во соработка со Здружението на лекари од општа и семејна медицина (ЗЛОМ-СМ), а со единствена цел: воспоставување на поцврста и покоординирана соработка меѓу сите нивоа на здравствена заштита.
„За прв пат сме собрани лекари од сите три нивоа на здравствена заштита и сега е моментот да ги искажеме нашите проблеми што секојдневно ги имаме во текот на нашата работа, а се поврзани со дијагноза, терапија и препраќање на пациентите на повисоко ниво на здравствена заштита. Само сите заедно можеме да ги идентификуваме и решиме пречките во обезбедување на ефикасна и целокупна здравствена заштита на нашите пациенти“, вели проф. д-р Дејан Докиќ, претседател на Македонското здружение за алергологија и клиничка имунологија (МЗАКИ).
Покрај атрактивните теми и панел-дискусии, дополнителна тежина на симпозиумот ќе му даде и присуството на проф. д-р Мохамед Шамџи (Prof. Dr. Mohamed Shamji), генерален секретар на Европската академија за алергологија и клиничка имунологија (EAACI), како и членството на нашата земја во новоформираната Централна и Југоисточна алијанса за алергија и астма (CSEA3).
Професоре, во тек се подготовките за 7. симпозиум на МЗАКИ, насловен „Новини во алергологијата и клиничката имунологија 2025“. Со оглед на големиот интерес во изминатите години, претпоставувам дека и оваа година нè очекува исклучително богат и посетен стручен настан. Што можете да ни откриете во овој момент околу подготовките?
Проф. д-р Докиќ: Токму така. И оваа година очекуваме голем број на учесници, како и изминатите години. Она што е посебно важно е дека овој настан ќе биде збогатен со присуството на генералниот секретар на Европската академија за алергологија и клиничка имунологија (EAACI), проф. д-р Мохамед Шамџи од Империјалниот колеџ во Лондон, којшто ќе ги објасни предностите од членството во ЕAACI. Тој исто така ќе го објасни главниот проект на Академијата за 2025 год. посветен на анафилаксата.
Темите што ги одбравме заедно со лекарите од ЗЛОМ-СМ се оние за коишто општите лекари и лекарите од семејна медицина покажуваат најголем интерес. Тие се: рационална примена на антибиотици во детската и адултна возраст, имунизацијата и предрасудите околу неа, пневмониите, алергиите, имунолошките заболувања, како и тронбоемболијата од кардиолошки аспект
Секако, на овој стручен настан ќе земат учество и локални експерти коишто со своето долгогодишно искуство ќе го збогатат симпозиумот.
Она што претставува новост е и нашето зачленување во новоформираната асоцијација Централна и Југоисточна алијанса за алергија и астма (CSEA3), при што сме единствена земја којашто не е членка на ЕУ.
Оваа година имате малку изменет концепт, односно симпозиумот се организира заедно со Здружението на лекари од општа и семејна медицина. Како дојде до соработката со ЗЛОМ-СМ и што очекувате од овој заеднички настап?
Проф. д-р Докиќ: Одамна постои потреба за синхронизирано лекување на пациентите почнувајќи од примарно, па се до терцијарно здравствено ниво. До денешен ден се уште постојат дискрепанци, коишто се надевам ќе ги надминеме за време на овој симпозиум.
Главните панел-дискусии се за астмата и хроничната опструктивна белодробна болест (ХОББ) на коишто учество ќе земат лекари од примарната, секундарната и терцијарната здравствена заштита укажувајќи на мултифасетната природа на овие болести
Треба да ги чуеме проблемите на општите лекари и лекарите од семејна медицина за да ги разбереме и адекватно да пристапиме кон нивното решавање. Помошта секогаш ќе биде понудена од лекарите од терцијарната здравствена заштита, а во интерес на обезбедување на поквалитетна здравствена услуга на нашите граѓани.
Кои се главните теми што ќе бидат обработени на симпозиумот и што конкретно ќе опфатат двете панел-дискусии?
Проф. д-р Докиќ: Темите што ги одбравме заедно со лекарите од ЗЛОМ-СМ се оние за коишто општите лекари и лекарите од семејна медицина покажуваат најголем интерес.
Тие се: рационална примена на антибиотици во детската и адултна возраст, имунизацијата и предрасудите околу неа (со посебен социолошки пристап), пневмониите, алергиите (како најчести хронични заболувања), имунолошките заболувања, како и тронбоемболијата од кардиолошки аспект.
Секако, главни панел-дискусии се за астмата и хроничната опструктивна белодробна болест (ХОББ) на коишто учество ќе земат лекари од примарната, секундарната и терцијарната здравствена заштита укажувајќи на мултифасетната природа на овие болести.
Симпозиумот обединува лекари од различни специјалности – педијатри, интернисти, ОРЛ специјалисти, имунолози, дерматолози, офталмолози… Колку е значајна мултидисциплинарната соработка во дијагностиката и лекувањето на алергиските и имунолошките болести?
Проф. д-р Докиќ: Како што спомнав пред малку, една од целите на овој симпозиум е продлабочување и синхронизирање на меѓусебната соработка на повеќето различни специјалности за да обезбедиме подобра и поефикасна здравствена заштита на пациентите што боледуваат од респираторни и алергиски болести. Проблемите што секојдневно искрснуваат на сите нивоа на здравствена заштита треба да ги надминеме и да обезбедиме еден заеднички и синхронизиран пристап во лекување на овие пациенти.
Напредокот на науката постојано носи нови сознанија и препораки. Кои се најновите научни и професионални достигнувања во областа на алергологијата и клиничката имунологија, кои ќе бидат презентирани на симпозиумот?
Проф. д-р Докиќ: Да почнеме со новите вакцини коишто се на повидок и коишто ќе бидат достапни за нашите пациенти. Пред се, станува збор за вакцини против респираторниот синцицијален вирус RSV како и 20-валентната антипневмококна вакцина. Секако, ќе стане збор и за новите вакцини против одредени типови на карцином.
Што се однесува за астмата, ќе бидат презентирани најновите препораки за дијагноза, терапија и превенција на истата, содржани во најновиот GINA-водич (Глобалната иницијатива за астма).
Исто така, учесниците на симпозиумот ќе бидат запознаени со новите препораки за лекување на хроничната опструктивна белодробна болест содржани во најновиот GOLD-водич (Глобална иницијатива за хроничната опструктивна белодробна болест).
Каква е Вашата порака до колегите кои ќе учествуваат на симпозиумот, и зошто е важно да бидат дел од вакви настани?
Проф. д-р Докиќ: Мојата препорака до учесниците на овој симпозиум е дека нивното присуство е од огромна важност бидејќи за прв пат сме собрани лекари од сите три нивоа на здравствена заштита и дека сега е моментот да ги искажеме нашите проблеми што секојдневно ги имаме во текот на нашата работа, а се поврзани со дијагноза, терапија и препраќање на пациентите на повисоко ниво на здравствена заштита. Само сите заедно можеме да ги идентификуваме и решиме пречките во обезбедување на ефикасна и целокупна здравствена заштита на нашите пациенти.
