Новото истражување на познатиот произведувач на играчки ЛЕГО, го обиколи светот. Според резултатите од истражувањето, дури три пати повеќе деца денес како кариера од соништата наведуваат влогување во однос на работа како астронаути. Истражувањето е спроведено во САД, Велика Британија и во Кина на примерок од 3.000 деца на возраст од 8 до 12 години и 326 родители.
Според него, денес поголемиот број на деца сакаат да станат влогери, додека работата како астронаути ја сметаат за неинтересна. Конкретно, една третина од децата рекле дека сакаат да станат јутубери кога ќе пораснат, додека само 11% од нив го навеле занимањето астронаут или лекар.
Интересно е да се истакне дека одговорите во голем дел зависеле од тоа од која земја детето доаѓа. Така повеќе од половина од Кинезите сакаат да станат астронаути и за нив ова занимање било најатрактивно. Следела работата како учителка, музичар и професионален спортист, додека работата влогер била на петто место.
Од друга страна, децата од САД и од Велика Британија за живот најмногу би сакале да заработуваат преку влогови, по што следи професијата наставник, спортист, музичар, па астронаут.
Пред две години било направено исто истражување за тоа што сакаат да станат децата кога ќе пораснат. Наместо влогери или јутубери, над 1.000 испитани деца помлади од 12 години во САД рекле дека како професија мечтаат за лекари, па потоа за ветернари, инжинери, полицајци и наставници.
