Научниците, експертите за детски развој, па дури и лекарите сè погласно предупредуваат за штетното влијание на прераното користење на паметните телефони кај децата. Додека некои истакнуваат дека децата не треба да добијат паметен телефон пред да тргнат на училиште, други тврдат дека до втората година од животот воопшто не треба да бидат изложени на екрани. Сепак, предупредувањата се едно, а реалниот живот нешто сосема друго. Да застанеме на момент и да слушнеме што велат стручњаците.
Новото истражување сугерира дека користењето на социјалните мрежи има значително влијание врз интеракцијата меѓу родителите и децата – дури и кога родителите не гледаат директно во екранот на телефонот.
Истражувањето, презентирано на конференцијата Digital Media and Developing Minds International Scientific Congress, го спровела докторантката Лиз Робинсон од Универзитетот во Алабама.
Комуникацијата за време на играта помеѓу родителот и детето е суштинска за социјалниот и емоционалниот развој, помага во развојот на извршните функции, ја зголемува концентрацијата и им помага на децата подобро да ги регулираат своите емоции
Нејзините резултати покажуваат дека мајките кои поминуваат повеќе време на социјалните мрежи помалку разговараат со своите деца. Проблемот е што помалку разговараат дури и во моментите кога не се на нивните телефони.
Истражувањето открива дека мајките кои ги користат социјалните мрежи повеќе (во просек 169 минути дневно) разговараат 29 % помалку со своите деца додека тие си играат. Интересно е што користењето на паметниот телефон или компјутер за проверка на е-пошта, читање вести и слично, не влијаело на интензитетот на разговорот.
Иако истражувањето сè уште не е рецензирано ниту официјално објавено, резултатите не ги изненадиле другите стручњаци. Мајките вклучени во студијата физички биле присутни во истата просторија со своите деца, но нивните мисли биле на друго место.
„Често ни одлетуваат мислите кон активности кои природно ни се попријатни, а знаеме дека користењето на социјалните мрежи е токму таква активност за многумина“, изјави за Си-ен-ен Крис Пери, извршна директорка на непрофитната организација Children and Screens, која ја организирала конференцијата.
Иако не била вклучена во истражувањето, Пери истакнува дека главната карактеристика на социјалните мрежи е токму привлекувањето и задржувањето на вниманието на корисниците.
Што можат да направат родителите за да ја променат оваа ситуација?
Експертите велат дека решението е едноставно – повеќе разговарајте со своите деца.
„Учењето на говорот и јазикот е од клучно значење за оптималниот развој на детето“, нагласува Пери. Таа додава дека поголемата изложеност на детето на јазик го подобрува развојот на мозокот, успехот во училиштето, комуникациските вештини и самиот развој на вокабуларот.
Резултатите покажуваат дека мајките кои поминуваат повеќе време на социјалните мрежи помалку разговараат со своите деца. Проблемот е што помалку разговараат дури и во моментите кога не се на нивните телефони
Комуникацијата за време на играта помеѓу родителот и детето е суштинска за социјалниот и емоционалниот развој, помага во развојот на извршните функции, ја зголемува концентрацијата и им помага на децата подобро да ги регулираат своите емоции.
Децата се свесни што и колку нивните родители гледаат во телефонот, а преку тоа учат што е важно во животот. Ако вниманието на родителите постојано е насочено кон паметниот телефон, на децата им испраќаме порака дека уредот е поважен од нив, вели Робинсон.
Затоа, родителите треба да донесат свесна одлука и да бидат ментално присутни во времето кога се дружат со своите деца.
Робинсон советува родителите да одредат период од денот во кој целосно ќе му се посветат на своето дете. Иако поради обврските тоа често е тешко, понекогаш се доволни и 15 минути фокусирање на детето и на неговите потреби.
Затоа, одредете време кога ќе го намалите звукот на телефонот, ќе го оставите во друга соба и ќе му се посветите на детето и на неговите потреби. Социјалните мрежи ќе бидат на истото место и откако детето ќе замине на спиење или на играње со своите врсници, пишува Си-ен-ен.
