Професорката Валери Одонел, од Универзитетот во Кардиф, е една од главните автори на студијата која се занимавала со улогата на хемикалиите кои ги содржат течностите за плакнење на устата во борбата против коронавирусот.
Имено, научниците веќе долго време веруваат дека пренесувањето на вирусот преку плунка би можело значително да се намали со употреба на антисептички средства за плакнење на устата, но со една, најважна состојка. Станува збор за Cetylpyridinium chloride, клучна состојка во многу течности за плакнење. Научниците имаат охрабрувачки резултати. Имено, оваа хемикалија има вируцидно дејство, што значи дека ги деактивира или уништува вирусите.
„Нашите досегашни резултати се многу охрабрувачки што се однесува до in vitro истражувањата, додека in vivo студиите сè уште не се објавени – што практично значи дека експериментите досега биле извршувани во средина која е налик на човечкото грло и фаринкс, но се уште не се направени во вистинско човечко грло“, изјави професорката Одонел за „Дејли телеграф“.
Сепак, научниците веруваат дека доколку дефинитивно се потврди дека оваа хемикалија помага во борбата против вирусот, тоа ќе помогне многу додека се чека вакцината.
„Ова е евтин и достапен производ. Ако навистина помага да се намали трансмисијата на вирусот, тоа е одлична вест, бидејќи значи дека целиот свет ќе има можност дополнително да се заштити. Се разбира, и понатаму ги чекаме клиничките истражувања“, заклучуваат научниците.
