Лепливите очи се вообичаена појава кај новороденчињата, а најчесто станува збор за незагрижувачки симптом. Тие се резултат на запушени солзни канали и се појавуваат во форма на бел или жолт исцедок во аглите на окото на бебето. Иако во повеќето случаи не треба да се грижите, ако оваа состојба не поминува, можно е да е предизвикана од бактерија што детето за фатило за време на породувањето и дека ќе биде потребно лекување.
Блокирани солзни канали
Солзните канали кај децата се блокираат поради остатоци од амнионската течност или кожни клетки. Исцедокот е леплив и може да ги залепи очните капаци на бебето.
Главно се работи за безопасна појава која може да се третира дома, без лекарска интервенција. Треба да се нагласи дека лепливите очи не се исто што и конјунктивитисот, но може да доведат до инфекции ако не се повлечат со текот на времето.
Не можете да спречите лепливи очи бидејќи бебето се раѓа со запушени солзни канали. Во првите неколку месеци од животот, солзните канали се отвораат и почнуваат да исцедуваат солзи без проблем. Во случај да не се отворат сами, потребна е лекарска интервенција.
Правилно чистење со физиолошки раствор
Лепливите очи може да ги чистите со памучен диск натопен во физиолошки раствор така што нежно ќе ги бришете аглите на счите на детето, од внатре кон надвор. За секое бришење користете нов памучен диск, а откако ќе ги избришете со физиолошки раствор, исушете ги очите со чист памучен диск, од внатре кон надвор.
Ако се работи за посериозен случај, можно е да треба да ги чистите очите на бебето после секое хранење.
Доколку физиолошкото чистење не е доволно и симптомите на бебето се влошат, можно е да се работи за бактериска реакција за што ќе биде потребно лекување под надзор на лекар. Вашиот лекар ќе ви покаже и како можете да ги масирате очните канали за да им помогнете на солзите да циркулираат правилно.
