Децата, како нас, најдобро учат на примери. Ако сакате да им всадите вистински вредности и да им изградите силен и достоинствен карактер, направете го тоа преку вашето однесување и постапки, наместо со приказни. Еве како да ги научите на некои позитивни карактерни особини преку вашето сопствено позитивно делување:
Почит
Научете ги децата што е почит со тоа што ќе ги почитувате и ќе покажете дека се грижите за тоа што тие имаат да кажат. Кога вашето дете ви се обраќа не го слушајте „попатно“, клекнете до него и погледнете го право во очи.
Почитувајте ја самостојноста на детето со тоа што понекогаш ќе му упатувате невербални сигнали наместо команди – на пример, подадете му рака пред да ја премине улицата.
Самоконтрола
Кога сте во искушение да почнете да викате, смирете се, земете неколку длабоки вдишувања и наместо тоа одговорете смирено. Бидете пример за вашите деца и во делот на исхраната. Ако вашите деца јадат премногу слатко, а вие им велите „доста колачи“, тоа значи дека е доста колачи и за мама и тато.
Сочувство
Кога вашето дете се жали за нешто, сфатете го тоа сериозно и понудете му решение, иако тоа можеби не ви изгледа како голема работа. Секогаш наоѓајте време во вашиот ден да слушнете што има да ви каже вашето дете и никогаш не сфаќајте ги неговите проблеми лесно, бидејќи тие се исто толку големи за нив како и нашите за нас.
Благодарност
Кога вашето дете ви помага со некои домашни работи или асистира при подготовка на ручекот, не заборавајте да му се заблагодарите за трудот. Покажете благодарност и за малите нешта во животот – сончев ден, снег, одење на излет – затоа што така вашето дете ќе учи од вас.
Простување
Покажете им на вашите деца што значи да му простите некому нешто – така што ќе бидете први што ќе им простите за нешто лошо што го кажале или направиле. Исто така, кога ќе ве „исфрлат од такт“ и вие самите користите високи тонови и можеби непримерни зборови, извинете им се на децата што сте викале.
Помагање
Најдобар начин да му покажете на вашето дете што значи да му помогнете на некого е да му помогнете на пријател кој има потреба и да му подадете рака. Направете „атмосфера за помош“ во вашиот дом, па кога вашето дете треба да одложи многу играчки или треба да ги отпакувате торбите откако ќе дојдете дома од продавница, помагајте си еден на друг и направете нешто забавно од тоа.
