Цуцлата често им е омилена „играчка“ на бебињата и тие изгледаат толку неодоливо со неа во уста, но кога ќе видиме дете од 3 или 4 години со цуцла, тоа не е природно.
Малите деца – новороденчиња и постари деца – имаат многу индивидуален однос кон цуцлите. Некои деца веднаш се навикнуваат на цуцлата, други не ја прифаќаат, ја плукаат и ја вртат главата кога ќе се обидете да им ја ставите во уста. Некои бебиња не можат да функционираат без цуцла, додека некои родители ја користат само кога детето плаче или не може да го заспие. Одвикнувањето на децата од цуцла може да биде доста предизвик за оние родители чии деца имаат навика постојано да ја држат цуцлата во уста.
Не постојат стандарди, норми и рокови кои точно одредуваат кога детето треба да се одвикне од цуцла. Научно е докажано дека цуцлите на никаков начин не влијаат на загризот бебето, не го забавуваат развојот на неговиот нервен систем и не го попречуваат варењето.
Кога точно ќе дојде време детето да се одвикне од цуцлата е лична работа на вашето семејство. Но, постои возраст кога не се препорачува ова да се прави, а тоа е пред 1 година. Факт е дека новороденчињата и децата под една година имаат високо развиен рефлекс на цицање – всушност, ако не им дадете цуцла, тие ќе си го цицаат прстот. На возраст до една година цуцлата е повеќе од адекватна – децата со цуцла во устата брзо се смируваат, полесно и поцврсто заспиваат, помалку се каприциозни итн. А сето тоа е токму затоа што со помош на цуцла, тие активно ги следат своите инстинкти.
Како да се одвикне дете од цуцла?
Првиот предизивик при одвикнувањето на детето од цуцла е тоа што многу деца не можат лесно да заспијат. Бебето ќе биде вознемирено и ќе одбива да спие. Тука нема рецепт, бебето треба да се измори, а вам ви треба многу трпение. За целосно сузбивање на навиката за спиење со цуцла потребни се 3-5 дена. Но за тој период треба да поминете најактивни денови со вашето дете, а особено навечер, да прошетате пред спиење, да го искапете во топла бања околу половина час пред спиење, да го нахраните и да го ставите во кревет. Со други зборови, телото на бебето треба да потроши доволно енергија за да биде подготвено да заспие, без оглед на надворешните околности.
Искуството на многу родители укажува дека еден од добрите начини да се одвикне детето од цуцла е да се понуди некому како подарок. „Сценариото“ најдобро функционира со помлад брат или сестра; со други познати деца; а доколку во кругот на пријатели, познаници нема деца, тогаш цуцлата може да ја дадете на верверица со младенчиња во парк или мачка со мачиња, птици и слично. Преку имагинацијата можете да го поттикнете вашето дете да се ослободи од оваа навика.
На пример: “Веќе си голема, а ќерката на тетка Наташа е многу мала, нема цуцла, па постојано плаче. Што мислиш да и ја дадеш цуцлата?”.
Чудно е, но децата обично не само што се спремни да се согласат на вакви гестови, туку и тоа го прават со големо задоволство… И сосема е можно тоа да е најбезболниот и „најхуманиот“ пристап за одвикнување на детето од цуцла, а тоа да го поминете без преголем стрес.
Меѓутоа, една многу важна работа: ако вашето дете е против чинот на давање, во никој случај немојте да ја одземате цуцлата со сила, не притискајте, не го нарекувајте алчно итн. Сите негативни емоции треба да се избегнуваат! Ако детето е категорично против разделба со цуцлата, тоа значи дека времето сè уште не е дојдено. Само бидете трпеливи.
Еве кои уште други работи не треба да ги правите кога ќе го одвикнете детето од цуцла:
- Не се лутете и не го карајте детето затоа што се уште користи цуцла.
- Не ја мачкајте цуцлата со разни состојки со непријатен вкус, како сенф, маст, нешто луто и горко и слично.
- Не го плашете детето со „хорор приказни“ за тоа дека може да му се случи каков било негативен инцидент ако продолжи да цица цуцла.
- Не го посрамувајте детето.
- Не ја менувајте тактиката.
