Боите се моќни, може да инспирираат, утешат, смират или возбудат. Малите деца можат особено да бидат чувствителни на влијанието на боите, па затоа не е занемарливо каква боја ќе одберете за нивната соба. Имено, многу психолози сметаат дека боите влијаат на расположението, а децата се посебно подложни на тоа влијание.
Науката за боите се применува во лекарските ординации, собите во градинка и слично.
Како одредена боја може да влијае на вашето дете?
ЦРВЕНА
Црвената боја е многу стимулирачка кај децата и може да го подигне нивното ниво на енергија, и потенцијално го зголемува вниманието, поради што знае да биде популарна и во предавалните ширум светот. Но, се чини дека премногу црвени детали, како на пример сите црвени ѕидови во собата, може да поттикнат и агресивно однесување, особено кај децата меѓу 4 и 6 години. Затоа е подобро да се бира оваа боја како детал за еден ѕид, а не како доминатна.
ПОРТОКАЛОВА
Ведра и светла, за портокаловите тонови се верува дека поттикнуваат желба за комуникација и социјализација. Децата кои си играат во соба со портокалови тонови покажуваат повеќе волја за соработка, имаат повеќе доверба и општо се екстровертни. Но, како и сите топли бои, премногу портокалово може да иритира и да создаде ефект на мрзеливост. Најдобро е да се користи во загасити варијанти и да се комибинира со боја на лаванда, нијанси на зелено или некои други пастелни тонови.
ЖОЛТА
Истражувањата покажуваат дека жолтата боја ја зголемува концентрацијата и помнењето. Избегнувајте ја ако детето има проблем со легнување навечер или ако наутро рано се буди – таа боја нуди премногу “сончева вибрација“. Најдобро е да се комбинира со сина, зелена или сива.
РОЗОВА
Иако најчесто се поврзува со собите на девојчињата, од тоновите на розевата боја корист може да имаат и двата пола. Тие смируваат, будат чувство на емпатија и грижливост. Но, премногу розева боја може да предизвика чувство на нервоза, па дури и главоболка.
КАФЕАВА
Кафевата боја е класичен земјен тон кој може на децата да им пружи чувство на стабилност. Но, тоа е боја која се одбрере како базна, дава можност за комбинирање со низа други бои во просторијата.
ЗЕЛЕНА
Тоа е боја на утеха, која во домот носи свежина и природност. Зелените детали во училниците го подобруваат читањето, како и разбирање на прочитаното. Внимавајте на нијансата, оти темно зелената може да создаде чувство на сенка и затвореност.
СИНА
Сината боја има смирувачки ефект, и не ечудно оти не асоцира на море, одмор, опуштање… Затоа оваа боја се препорачува за соба на децата кои често имаат испади на бес, оти наводно ги забавува отчукувањето на срцето, го намалува крвниот притисок и го смирува дишењето кај вознемирените лица. Најдобро се неутрализира со жолт или црвен детал.
ВИОЛЕТОВА
Виолетовата боја поттикнува спиритуалност, чувствителност, а ако детето е пречувствително, треба да се избегнува оваа боја за неговата соба, освен во ситни детали. Премногу виолетова, доведува до чувство на мачнина, па дурии до физичка тромост.
СИВА
Сивата може да биде многу впечатлива ако се користи во детали. Како доминантна боја може да доведе до чуство на осаменост, па затоа внимавајте кога ја комбинирате во собата на детето.
