Долгите часови поминати пред телевизор, компјутер или таблет веќе имаат сериозни последици – сè повеќе деца страдаат од прекумерна тежина и проблеми со ‘рбетот. Истражувањата покажуваат дека децата кои гледаат телевизија повеќе од 3 часа дневно имаат двојно поголем ризик од дебелина, за разлика од оние кои пред екран поминуваат помалку од 2 часа.
Ако вашето дете не покажува интерес за физичка активност, не е доцна да му помогнете да открие дека движењето може да биде забавно. Еве неколку идеи кои ќе го активираат вашето дете и ќе ве зближат како семејство:
- Пливање – идеален спорт за целото тело
Ако размислувате за спорт, пливањето е еден од најдобрите избори. Го подобрува дишењето, го јакне срцето и ги активира сите мускули, особено оние на грбот – што придонесува за правилно држење на телото. Освен тоа, децата уживаат во водата, па тешко ќе го доживеат како обврска.
- Возење велосипед или ролери – движење на отворено
Овие активности се забавни, активираат повеќе групи мускули и се одлични за кардиоваскуларното здравје. Организирајте семејни трки, направете предизвици или прошетки по природа – децата сакаат натпревари, особено со родителите!
- Танцување – движење што не изгледа како вежба
Не ви треба ништо повеќе од добра музика и малку простор. Вклучете ја омилената песна и танцувајте заедно со детето. Ова е одличен начин да ја активирате физичката енергија без да изгледа како обврска – и притоа сите ќе се насмеете.
- Семејни прошетки – време за движење и блискост
Барем еднаш неделно, излезете заедно во парк или на планина. Пешачењето во природа, особено ако го направите забавно со игри или мали натпревари, не само што го раздвижува телото туку создава и убави семејни моменти.
- Скокање на трамболина – забавно и ефективно
Според истражувања, 10 минути скокање имаат ист ефект како 30 минути трчање. Скокањето ја подобрува рамнотежата, координацијата и моториката – а децата едноставно го обожаваат. Само внимавајте трамболината да биде безбедна и поставена со надзор.
Наместо да се борите со екраните, понудете алтернатива што е повозбудлива и подинамична. Вклучете се и вие – така детето ќе добие мотивација, а вие време за поврзување.
