Ако болеста на вашето дете е толку напредната да е задолжително одење во болница, ќе мора и себе, но и детето да го подготвите за одредени работи. Првото нешто што треба да го направите сами е да се едуцирате.
Искористете ги сите можни извори на литература, разговарајте со вашиот педијатар за точно да ви објасни кои се карактеристиките на болеста и како може да се лекува. За време на консултацијата, прашајте за можните несакани ефекти или компликации.
Следниот чекор е да го подготвите детето за одење во болница. Болницата на децата им претставува непознат простор и им предизвикува голем страв. Мал е бројот на деца кои влегуваат во болница целосно ладнокрвни. Неопходно е да им објасните на малите деца дека нема да можете постојано да бидете со нив, туку дека ќе ги посетувате во сите можни прилики. Обидете се да го смирите детето, објаснете му дека мора да оди во болница бидејќи тоа е најдобро за него. Ако детето треба да подлежи на некој оперативен зфат, подгответе го за тоа дека ќе чувствува болка некое време по операцијата, но дека се ќе помине и повторно ќе биде здраво.
Пред самото одење во болница и хоспитализирање на вашето дете, проверете дали сте ги спакувале сите работи што можеби му требаат. Откако ќе влезе во болница, детето се среќава со деца од различни возрасни групи, замолете ја медицинската сестра на одделението да го запознае вашето дете со другите, но и запознајте ја медицинската сестра со навиките за живот на детето. Кажете ѝ дали вашето дете треба да слушне приказна пред спиење или која е неговата омилена играчка.
Откако ќе го примат, повторно потсетете го детето дека нема да можете постојано да бидете со него. Денес, многу педијатриски болници функционираат на таков начин што им овозможуваат на родителите да поминуваат што е можно повеќе време со своите деца. Некои болници дури им нудат на родителите да преноќат покрај детето.
Ако вашето дете има потреба со вас да ги сподели своите чувства и ставови поврзани со неговиот престој во болница, слушајте го и не минимизирајте ги неговите искажани ставови. Обидете се да му влеете што повеќе самодоверба на детето, но и доверба во лекарите и медицинскиот персонал. Уверете го дека е тука за да му се помогне.
