Утрата пред тргнување во градинка, училиште или на работа често знаат да бидат вистински мал хаос – особено кога имате мали деца. Затоа, секој трик што може барем малку да го олесни подготвувањето и да го намали стресот е повеќе од добредојден.
Еден од честите проблеми е и обувањето чевли на правилната нога. Малите деца лесно се збунуваат, а тоа може да потрае – особено кога брзате. Токму затоа воодушевува едноставниот трик што една мајка го сподели на социјалните мрежи.
Австралијката Шантел Мила, мајка на две деца која редовно споделува практични совети на социјалните мрежи, покажа како со помош на налепници овој проблем може да се реши за неколку секунди.
Сè што ви треба се налепници и ножици – нешто што повеќето родители веќе го имаат дома. Изберете налепница што ќе му се допадне на детето и пресечете ја на половина, така што деловите ќе можат повторно да се спојат во целина.
Потоа залепете по една половина во секоја чевла. Кога детето ги обува чевлите, доволно е да ја спои налепницата – и веднаш ќе знае која чевла оди на лева, а која на десна нога.
Едноставно, а генијално.
Родителите во коментарите брзо го пофалија овој трик. „Буквално утрово го имав истиот проблем со моето дете – благодарам!“, напиша еден татко.
Други се согласија дека ваквите мали идеи можат да заштедат многу време, а една мајка се пошегува: „Ова е толку добро што треба да го патентираш!“
