Трпението е голема доблест, но родителите знаат дека им треба многу време на децата да го стекнат. Учењето на децата на трпение не само што ќе ја олесни посетата на продавница или чекањето на ред, туку ќе ги научи и на придобивките од одложеното задоволство што ќе им служи во нивната идна работа и односи. Секој пат кога во текот на денот ќе почувствувате дека сте исцрпени од обидите да ги научите децата на трпение, запомнете дека тоа е исклучително важна животна вештина која ќе им служи долго време.
- Бидете им пример
Тешко е да се биде трпелив кога не сте сосема сигурни што тоа значи и затоа е важно на детето да му дадете пример за трпение во одредени ситуации. Ако на детето му треба многу време да се облече пред да излегување, попатно коментирајте дека тоа е во ред, дека ќе почекате и ќе бидете трпеливи додека не заврши. Децата ќе го следат вашиот пример.
- Поттикнете ја креативноста
За децата, концептот на време е прилично апстрактен, но она што можете да ги научите е концептот на одложено задоволство. Ако заедно печете колач и треба да почекате да се испече и олади пред да го украсите, започнете разговор како ќе го украсите, што ќе користите.
Ако ги вклучите децата во процесот на размислување за тоа што следува, времето ќе им помине побрзо, а тие ќе имаат идеја за следниот пат кога ќе треба да чекаат нешто. Избегнувајте мобилни телефони и лаптопи во овие ситуации и поттикнете го детето да биде во сегашниот момент.
- Објаснете им што ќе се случува
Уште само малку или само уште една-две минути се два сосема неразбирливи концепти за детето на кое една минута може да му изгледа како вечност. Наместо тоа, објаснете му по кој редослед ќе се случат работите, пред да дојде редот на она што го чека.
- Биди искрени
Родителите честопати им ветуваат на своите деца дека ќе им исполнат некоја нивна желба во блиска иднина, некогаш, можеби еден ден и слично. Така, тие им даваат надеж дека навистина ќе го направат тоа, но честопати не го исполнуваат своето ветување.
Со ваквото однесување создавате недоверба кај децата бидејќи со текот на времето тие почнуваат да сфаќаат дека тоа што сте го кажале не е вистина. Истото важи и за лажењето дека нешто ќе биде брзо, кога знаете дека нема да биде. Бидете искрени и дајте му ги на детето сите информации што ги имате за ситуацијата.
