Кожата на бебето е исклучително нежна и мека и како таква бара соодветна нега. Изложеноста на одредени хемикалии, вештачки материјали, но и временските услови може да ја направи детската кожа сува и груба, но и да доведе до појава на црвенило, лупење на кожата и слично. Во зимски услови особено е важно на адекватен начин да се грижите за бебешката кожа, а овие совети ќе ви го олеснат тоа.
Заштитете ја кожата со облека
Бебињата немаат целосно развиен систем за терморегулација, па затоа е многу важно да се погрижите да не им е ниту премногу жешко, ниту премногу ладно. Најдобро е детето да го облекувате слоевито, бидејќи така секогаш можете по потреба да додадете или соблечете слој облека.
Имајте на ум дека бебињата може да добијат осип доколку ги загреете премногу, а тој најчесто се појавува на наборите на кожата.
Намачкајте ги усните на бебето
Бебињата многу се лигаават, што е особено незгодно во постудените денови бидејќи кожата лесно пука на места каде што е влажна. За да го спречите тоа, намачкајте го детето со соодветен балзам за усни пред да излезете надвор – ова е чекор што родителите често го забораваат, а може многу да помогне.
Не претерувајте со капењето
Кожата на бебето е склона кон сушење, а прекумерното често капење само дополнително ќе ја исуши. Во ред е да го капете бебето еднаш дневно, но внимавајте водата да не е премногу топла, а исто така избегнувајте производи кои содржат парфеми и други адитиви, бидејќи сите тие придонесуваат за сушење на кожата.
Користете производи наменети за бебиња
Бидејќи кожата на бебето е толку нежна, важно е да се грижите за неа со најчистите, односно најприродните можни производи. Повеќето производи за нега на возрасни имаат состојки кои можат да ја иритираат кожата на вашето малечко, но и да предизвикаат алергии, па затоа најдобро е да користите само производи наменети за бебиња.
Хидрирајте ја кожата на вашето бебе
Како и возрасните, некои бебиња имаат сува кожа која бара хидратација. Тоа значи секојдневно нанесување со соодветни креми, но повторно, препорачливо е да се изберат производи кои не содржат мириси, бои и други адитиви кои можат да ја иритираат кожата.
