Се разбира, не можете да дозволите детето да прави сè што сака, бидејќи во многу ситуации тоа може да биде опасно за неговото здравје или живот. Сосема е нормално малите деца да не умеагт добро да ги проценат ризиците, бидејќи на рана возраст немаат доволно ментален капацитет за тоа, а родителите се тука да ги насочуваат и да им поставуваат граници.
Меѓутоа, како што сите знаеме, ова поставување на граници не оди секогаш без проблеми, па многу деца умеат сериозно и упорно да протестираат на секое „не можеш“ или „не смееш“ на мама и тато, а особено кога околу себе гледаат деца на кои им е дозволено да го прават она што тие би сакале.
Не е невообичаено да на некоја поставена граница од вашето дете на предучилшна возраст да слушнете „Но, не е фер“, бидејќи токму тој е периодот кога почнуваат да сфаќаат дека не важат сите услови за секого – на пример, не можете да дозволите четиригодишно дете да се качува на ограда, додека тоа гледа некое постаро дете кое го прави токму тоа.
Без оглед на сè, многу е важно родителите да постават јасни правила и забрани кога е потребно, но и да му објаснат на детето зошто не може да прави нешто што го прави некој друг.
Психолозите за рускиот портал Parents споделуваат совети како да му објасните на детето зошто не смее да прави нешто што му е дозволено на некој друг.
- Зошто не можам да си легнам подоцна?
Психолозите велат дека ваква „потреба“ најчесто се јавува во семејства каде има повеќе деца, кои поради различната возраст имаат различни рутини. Тогаш е вообичаено помалото дете да се противи што тоа не може да прави сè исто како неговиот постар брат или сестра и смета дека не е фер што мора да си легне, додека тие се уште не ги измиле ни забите.
Тогаш обидете се да му објасните на детето дека неговиот брат или сестра се посебни личности и не мора да прават сè исто. На пример, ако тато носи очила, тоа исто така значи дека сите деца мора да ги носат, а истото важи и за рутините. На различни возрасти, телото има различни потреби, а на петгодишното дете му треба повеќе сон од осум или 12-годишното дете.
Смирете го малиот бунтовник и кажете му дека кога ќе порасне и тој подоцна ќе може да си легне, исто како брат му или сестра му.
Совет на психолозите е да и кога се обидувате да му објасните нешто на детето, третирајте го како да е еднакво со вас. Децата сакаат брзо да пораснат и да бидат возрасни, затоа искористете го тоа во ваша корист. Со текот на времето, желбата да ги имитира возрасните ќе му помогне да го прифати она што не му се допаѓа.
- Зошто морам да јадам овошје кога сите јадат колачи?
Без разлика дали се работи за колаче или купување на скап телефон, не двоумете се да му објасните на вашето дете дека секое семејство има свои правила, граници, обичаи и вредности. На пример, вашето семејство се труди да води здрав живот, а тоа подразбира да не се јадат премногу слатки. Ако се работи за мало дете, можете да му објасните дека ако јаде премногу слатки, нема да има доволно сила или енергија да учествува во семејните возења со велосипед, скијање…
- Зошто другите добиваат повеќе џепарлак од мене?
Прашањето за пари е секогаш многу чувствително, но важно е да бидете искрени со детето во врска со тоа. Разговарајте со него како возрасен за тоа како се распределува семејниот буџет, советуваат психолозите. Објаснете му дека најголемиот дел од заработените пари одат за храна, облека, сметки… Исто така, напоменете му го дека семејствата имаат различни буџети и трошоци и дека од тоа зависи и висината на џепарлак што го добиваат децата.
Сепак, дајте му до знаење дека тоа не е нешто за што треба да очајува, туку наместо тоа, размислете на што би можело детето да ги потроши тие пари – или на нешто ситно или да го одвои и на тој начин да заштеди за нешто што сака да го купи.
