Кај малите деца, тешко е да се одреди дали ги мачи влажна или сува кашлица бидејќи не можат да ни кажат. Најчесто, кај детето кашлањето го предизвикува течноста која се слева во ждрелото и ја надразнува и иритира слузницата. Помош за мало дете може да биде овлажнувач на воздух, односно ставање садови со вода или влажни крпи на радијаторите и зголемен внес на течности. Лек против кашлица на многу мало дете може да се дава само со препорака на лекар.
Кога на лекар?
Ако детето почне да кашла со сува кашлица, а потоа кашлицата стане влажна и можно е искашлување, при што секретот е белузлав, непроѕирен, потоа пожолтува, придружен симптом е покачена температура, постои голема веројатност дека се работи за воспаление на бронхиите – бронхитис. Воспалението ја зафаќа слузницата на бронхиите, а може да се прошири се до крајот на бронхијалното стебло и дел од ткивото на белите дробови – алвеолите.
Бронхитисот најчесто се јавува како компликација на настинка, бидејќи воспалението „се спушта“ од горните дишни патишта во долните.Често, на вирусните инфекции се надоврзува и бактериска инфекција. Затоа, доколку по настинка од два-три дена, а која може да биде проследена и со зголемување на телесната температура, состојбата се влоши, секако консултирајте се со лекар кој врз основа на наодите и анализите ќе ви одреди понатамошен третман и веројатно ќе препише антибиотици.
