Секое дете е единствено и носи свои посебни карактеристики. Тоа што еден воспитен пристап функционира кај едното дете, не значи дека ќе биде успешен и кај другото. Едно може да биде тивко, совесно и одговорно, додека друго е тврдоглаво, гласно, сака да прави неред и постојано е во движење. Затоа психолозите нагласуваат дека не постои универзална формула за воспитување — пристапот треба да се прилагоди на темпераментот на детето. Во продолжение следуваат совети како да му пристапите на секој тип карактер.
Чувствително дете
Чувствителните деца се емпатични, искрени и многу грижливи. Тие силно го доживуваат светот околу себе и често се повредуваат од најмала забелешка. Затоа им е потребно многу охрабрување, чувство на сигурност и внимателност во комуникацијата.
Бидете нежни со зборовите — сè што ќе кажете тие го примаат длабоко при срце. Признајте ги нивните емоции наместо веднаш да ги исправате. Дајте им простор да ги изразат чувствата, а потоа полека објаснете им што е прифатливо, а што не. Овие деца природно носат емпатија и љубов — особини што се ретки и вредни, затоа негувajте ги и поддржувајте ги.
Одлучно дете
Одлучните деца се мали лидери — сакаат да пробуваат, да учат и да прават сè самостојно. Понекогаш тоа може да изгледа како тврдоглавост, но токму преку оваа потреба за независност тие учат најбрзо.
Оставете ги да се обидат, дури и кога ни изгледаат премногу мали за задачата. Поддржете ги во секој чекор и пофалете го напорот, не само успехот. Кога ќе добијат простор да истражуваат сами, одлучните деца растат во уверени, организирани и успешни личности.
Дете кое сака забава
Овој тип деца е радосен, разигран и сака да биде во центарот на вниманието. Тие често прекинуваат, поставуваат прашања и бараат интеракција.
Родителите треба да ги видат овие особини како предност, а не како проблем. Спуштете се на нивно ниво — играјте, смејте се, создавајте заедно. Ваквите деца најдобро учат преку забава.
Кога станува збор за дисциплина, пристапете нежно. Тие се многу чувствителни на тон и атмосфера, затоа благиот пристап секогаш дава подобри резултати.
Сериозно дете
Сериозните деца често се повозрасни од својата возраст — зрели, аналитични, вредни и длабоки мислители. Но знаат да се борат со перфекционизам и прекумерна самокритичност.
Кога разговарате со сериозно дете, слушајте ги внимателно нивните идеи и сфатете ги сериозно. Ако не се согласувате, кажете им отворено и логично објаснете зошто.
Овој тип деца најдобро реагираат на рационални објаснувања наместо на слепи наредби. Со јасна комуникација и почит кон нивните мисли, тие блескаат.
Активно дете
Активните деца имаат огромна енергија која мора правилно да се канализира. Наместо да барате од нив да седат мирно — што им е природно тешко — подобро е да им дозволите да се движат, да учествуваат и да се изразуваат.
Вклучете ги во спортови, активности и игри што им овозможуваат да „се испразнат“. Ако останат задржани предолго, нивната нервоза и фрустрација брзо ќе излезат на површина. Кога нивниот ден е исполнет, многу полесно се контролира нивното однесување.
