Психологот Франсине Зелцер, мајка на две момчиња, за порталот Parents открива на кои работи во воспитувањето им дава приоритет, и како родител и како детски психолог.
Кои се пријателите на моите деца?
Со кого е пријател вашето дете може да има големо влијание врз неговиот развој. Како ќе знам дали мојот син има добри пријатели и дали може да се залага за себе? Насочете ја својата енергија на запознавање со пријателите на вашите деца и нивно едуцирање како да стекнат добри пријатели. Договорете дружење со мајките или запишете ги на воннаставни активности и разговарајте со вашето дете по настанот за тоа како поминало.
Дали моето дете е љубезно?
Понекогаш гледам деца кои се однесуваат злобно, не затоа што всушност се злобни, туку затоа што слушнале или биле сведоци дека другите се злобни. Децата се како сунѓери, впиваат сè, дури и кога мислите дека не обрнуваат внимание. Секогаш се трудам да ги научам моите деца да бидат љубезни со другите. Водам и искрени разговори со нив соодветни на возраста за тоа како се чувствуваат кога гледаат како другите се нељубезни.
Дали носам правилни образовни одлуки за своите деца?
Иако не можам да ви кажам што е најдобро за вашите деца, можам со сигурност да кажам дека ниту една одлука што ќе ја донесете за вашите деца не е испишана во камен. Ако мислите дека можеби ги притискате премногу, обидете се да се повлечете и да видите како ќе биде. Ако не сте задоволни со нивното училиште, оделение или воннаставни програми, побарајте состанок или направете промена. Ако вашето дете се мачи и заостанува, побарајте проценка од професионалец.
Дали моето дете е среќно?
Наместо само да се грижите за тоа, директно прашајте ги вашите деца секој ден како се чувствуваат и обидете се да не ги отфрлите нивните грижи. Важно е да ги потврдите чувствата на детето и да му покажете дека сте тука да го сослушате.
