Почнувајќи од 2-годишна возраст, лекарот ќе го одредува индексот на телесна маса (БМИ) на детето на сите рутински прегледи. Бидејќи БМИ се менува со возраста, лекарите ги исцртуваат мерењата на БМИ на децата на стандардни графикони специфични за висината и тежината. За време на неколку посети, лекарот може да го следи моделот на раст на вашето дете.
Иако не е совршена мерка за телесните масти, БМИ помага да се идентификуваат децата кои премногу бавно или пребрзо добиваат телесна тежина.
Што значат перцентилите?
Перцентилите на БМИ покажуваат какви се мерките на детето во споредба со други од ист пол и возраст. На пример, ако детето има БМИ во 60. перцентил, 60% од децата од ист пол и возраст кои биле измерени имале понизок БМИ, според Kidshealth.
БМИ не е директна мерка за телесните масти. Децата може да имаат висок БМИ ако имаат големо тело или многу мускули, а не вишок масно ткиво. Дури и мало дете може да има нормален БМИ, но и понатаму да има премногу масно ткиво.
БМИ е помалку точен за време на пубертетот. Вообичаено е децата брзо да добијат на тежина – и да видат како нивниот БМИ се зголемува – за време на пубертетот. Вашиот лекар ќе ви помогне да разберете дали ова зголемување на телесната тежина е нормален дел од развојот или нешто за што треба да се загрижите.
Категории што ја опишуваат телесната тежина на една личност се:
- Потхранетост: БМИ е под 5-тиот перцентил за возраста, полот и висината.
- Нормална тежина: БМИ еднаков или поголем од 5-от перцентил и помал од 85-от перцентил за возраст, пол и висина.
- Прекумерна тежина: БМИ на или над 85-от перцентил, но помал од 95-от перцентил за возраста, полот и висината.
- Обезност: БМИ е на или над 95-от перцентил за возраста, полот и висината.
Важно е да се гледа на БМИ како тренд наместо да се фокусира на поединечните бројки. Секое мерење извадено од контекст може да ви даде погрешен впечаток за растот на вашето дете.
Иако БМИ е важен показател за здрав раст и развој, БМИ не е совршена мерка за телесните масти. Ако сте загрижени дека вашето дете премногу брзо добива или губи тежина, разговарајте со вашиот лекар.
