Постои ли универзално правило кое може да ви помогне да имате повеќе трпение со децата, особено оние во предучилишна возраст?
Можеби правило не постои, но подобро кажано постои совет – живејте во сегашноста. Додека ова навистина звучи како уште еден совет кој не функционира и нема смисла, размислете за почеток кои се најчестите причини поради кои немате трпение со децата?
Најчесто станува збор за тоа дека вам ви се брза и сакате нешто да направите на време, а тие вас не ве слушаат или едноставно ги игнорираат вашите наредби, однесувајќи се невоспитано, и што и да кажете никогаш тоа не го прават… и така постојано.
Но како тука може да ви помогне да живеете во сегашноста? Тоа значи пред да го изгубите трпението, сетете се дека станува збор за деца. Не се работи за мали роботи кои прават се што ќе им кажете, ниту пак за личности кои живеат само да ве полудат. Вашите деца се мали човечки суштества кои само сакаат да живеат онака како што најдобро им одговара.
Секако, секогаш треба да се знае да се повлече граница и да не им се дозволи да прават буквално што сакаат, но пред да ги изгубите нервите, погледнете го светот од нивна перспектива. Ним не им се важни вашите дневни обврски, тие не знаат дека денес ви бил стресен ден, и не им е битно што вас ве боли глава и едноставно не сте расположени. На пример, во прошетка или при возење велосипед, малите деца сакаат да уживаат во истражувањето и во времето поминато со своите родители.
Обидете се да уживате во тој момент и обидете да го гледате светот низ детските очи.
Кога тоа ќе го направите, ќе почнете да сфаќате дека децата се само деца, ќе се чувствувате поопуштено, ќе уживате и ќе се смеете со нив. Затоа, кога ќе се фатите дека немате трпение, особено со помалите деца, запрашајте се имате ли оправдана причина за тоа или едноставно сте заборавиле дека децата имаат свој поглед на животот и обврските, а не ваш… Многу полесно ќе ги поднесете секојдневните ситуации и полесно ќе го разберете детето, и на крајот ќе имате повеќе трпение.
