Често родителите се прашуваат што треба да направат кога на детето од било која причина ќе почне да им тече крв од носот. Што според лекарите е најправилно да направите за да сопрете крварење од нос кај децата.
Со чисто шамивче треба да се избрише крвта и да се утврди од која ноздра детето крвари или дали крвта доаѓа од двете ноздри, што поретко се случува. Поголемите деца треба кратко да го издуваат носот и така да го исчистат местото на крварење од секрет или од евентуално да се отстрани ситно туѓо тело.
Детето треба да седне, глвата треба да му се навали лесно напред (не наназад, како што често погрешно се прави). Ако главата се позиционира наназад, крвта се слева во грлото, а тоа не се гледа, па може да се случи детето непотребно да изгуби многу крв. Тоа не може да се случи ако детето се наведне нанапред, и затоа тоа е вистинската положба.
Во таа положба, со главата нанапред, треба да се изврши притисок на ноздрата од која тече крв. Тоа најлесно се прави со прст кој се потпира од страна, така да ноздрата се “залепи“ со коскената преграда на носот. Прстот не треба одоздола да се бутка, туку само од страна. Најдобро е детето да диши на уста додека се притиска носот.
Треба да се биде трпелив и да се почека најмалку 10 минути пред проверка дали крварењето престанало. Ако прерано се отпушти притисокот заради проверка, а крварењето не сопрело, се треба да се направи од почеток.
Ако по 10 -15 минути правилен притисок, крварењето не запира, треба да се стават капки или спреј за нос кои ги стеснуваат крвните садови. Потоа притисокот на ноздрата се повторува и така се држи 15 минути.
