Mногу заразни вируси започнуваат со покачена телесна температура. Термометарот е клучна алатка за да откриете дали вашето дете има треска, но дали знаевте дека ако не е чист, тој може да стане главен пренесувач на микроби меѓу членовите на семејството?
„Ако термометарот го користи само едно лице, нема потреба од постојана стерилизација“, објаснува д-р Роберт Френк, медицински директор на Одделот за инфективни болести во Детската болница во Синсинати. „Но, ако го користат повеќе луѓе, мора да ги уништите микробите пред секоја употреба — дури и ако сите имаат нормална температура.“
Еве ги чекорите за правилно одржување на четирите најчести типови термометри:
Дигитални термометри
„Ако користите дигитален термометар најсигурен начин е да го пребришете со медицински алкохол или марамче за дезинфекција и да го оставите да се исуши на воздух“, советува д-р Френк.
- Изберете медицински алкохол со најмалку 60 % алкохол, бидејќи тоа е најефикасно за убивање на бактериите, според Центрите за контрола и превенција на болести (ЦДЦ). Натопете памучен тупфер со алкохол. Можете да користите и марамче со средство за дезинфекција.
- Пребришете го целиот термометар со растворот за дезинфекција, внимавајќи темелно да го истриете.
- Исплакнете го термометарот под млаз ладна вода за да ги отстраните трагите од алкохол. Избегнувајте мокрење на дигиталните компоненти, како што е екранот. Ако сакате да ги исчистите овие делови, избришете ги со влажна крпа.
- Оставете го дигиталниот термометар да се исуши на воздух пред да го тргнете на страна. Бришењето со крпа би можело повторно да внесе бактерии.
Како алтернатива, можете да користите сапун и вода. Но, повторно, не треба да ги потопувате дигиталните компоненти бидејќи тоа може да го оштети уредот, вели д-р Френк.
Ректални термометри
Овој тип најчесто се користи за деца до 3-годишна возраст. Чистете го со истиот метод со алкохол (или со топла вода и сапун, без потопување на целиот апарат). Ректалниот термометар мора да се дезинфицира и пред и по употребата.
Совет плус: Никогаш не го користете истиот термометар и ректално и орално, дури и ако производителот тврди дека е универзален. Најдобро е ректалниот термометар јасно да го обележите со налепница за да избегнете случајна замена.
Инфрацрвени термометри
Овие термометри ја мерат температурата надворешно, обично на челото, и се одлична опција за оние со пребирливи (немирни) деца. Некои производи работат без директен допир со кожата, но сепак треба да ги дезинфицирате пред и по секоја употреба. Исчистете го сензорот со памук или тупфер натопен во медицински алкохол; тој треба да има најмалку 60 % концентрација на алкохол. Марамчињата со средство за дезинфекција или алкохол исто така помагаат. Оставете го термометарот да се исуши пред да го соберете.
Термометри за уши
Како што сугерира самото име, ушните термометри се вметнуваат во ушниот канал за да ја прочитаат температурата. Избришете го малечкиот сензор со стапче за уши натопено во медицински алкохол, а потоа оставете го да се исуши. Можете исто така да го избришете телото на термометарот со малку навлажнета крпа, но повторно, треба да избегнувате негово потопување во вода за да спречите оштетување.
