Артериската хипертензија кај децата е важно да се открие што порано и да почне да се лекува за да се спречи развој на оштетувања на органите кои со хипертензијата се најмногу загрозени (кардиоваскуларниот систем, бубрези, очи и мозок), како и да се спречат бројни можни компликации во возрасниот период.
За тоа да се постигне, потребно е крвниот притисок да се одржува под 90-тиот перцентил за возраст, пол и телесна висина кај децата до 15. година (за секое дете горната граница на нормалните вредности на притисокот се одредува индивидуално), како и под 130/85 ммХг кај адолесценти до 16 години и постари.
Пристапот во лекувањето хипертензија кај децата зависи од причината и тежината на хипертензијата. Лекувањето на артериската хипертензија може да биде немедикаментозно (без користење на лекови) и медикаментозно (со земање на антихипертензиви – лекови за намалување на притисокот).
Артериската хипертензија кај децата и младите е потребно што порано да се открие за да се спречи оштетување ан бројни органи, првенствено на срцето и крвните садови, бубрезите, очите и мозокот.
Немедикаментозното лекување ја чини основата на лекување на секоја форма на артериска хипертензија во сите возрасни групи. При неговото спроведување важно е да се вклучи целото семејство бидејќи таквиот пристап го зголемува успехот на оваа мерка. Немедикаментозното лекување вклучува низа мерки чија цел е промена на животните навики т.е. усвојување на здрави прехранбени навики, регулирање на телесната тежина кај обезните, адекватна физичка активност и контрола на стресот.
Еден од главните фактори во исхраната кој негативно влијае на крвниот притисок е прекумерното внесување сол. Најголеми извори на сол во исхраната на децата и младите се пекарските производи, “брзата храна“, грицките и сувомесните производи и тие треба што помалку да се консумираат. Детето во првата година од животот треба да внесува помалку од 1 грам сол дневно, на возраст од 1-3 години до 2 грама, од 4 до 6 години до 3 грама сол, а по 7 години до максимум 5 грама сол дневно. За илустрација, просечниот солен ѓеврек или перек купен во пекара може да содржи повеќе од 1 грам сол. Важна прехранбена мерка е и избегнување на заситени масти и храна богата со шеќер, особено сокови. Пожелно е да се јаде што повеќе свежо овошје и зеленчук, млечни производи, млади месо и интегрални житарки, а жедта да се гаси со вода.
Основата на третманот на артериската хипертензија се промените во животните навики кои вклучуваат намалување на внесот на сол, секојдневна физичка активност и нормализирање на телесната тежина.
Физичката активност поволно влијае на здравјето, а со тоа и на крвниот притисок. Современиот начин на живот со мало движење придонесува за зголемување на килограмите, а од друга страна изостанува поволниот ефект на вежбањето на притисокот. Познато е дека при самото вежбање доаѓа до краткотрајно зголемување на крвниот притисок, но како што напредува активноста, притисокот се нормализира и долгорочно се намалува кај луѓето кои имале висок крвен притисок пред периодот на вежбање. За деца на возраст од 5 до 17 години се препорачува најмалку 60 минути физичка активност со умерен до силен интензитет дневно. Не се препорачуваат кревање тегови и изометриски вежби поради краткотрајни, ненадејни скокови на притисок.
Прекумерната тежина денес е факторот кој најмногу влијае на појавата на артериска хипертензија кај децата, па нејзиното нормализирање е пресудно за регулација на крвниот притисок. Важно е намалувањето на телесната тежина да биде постепено од околу 1-2 кг месечно со редовен лекарски надзор. Кај помалите деца, главно е доволно да се одржува телесната тежина со растот на детето се додека не се постигне оптимална телесна тежина во однос на телесната висина.
Стресот стана составен дел од модерниот живот. Затоа, на децата со покачен крвен притисок им се советува да најдат активност која ги опушта (на пр. слушање музика, читање, шетање во природа).
Во случај кога овие мерки да не се доволни за контрола на притисокот, потребно е да се применат лекови. Тие се користат и за тешка хипертензија, хипертензија која е проследена со симптоми или хипертензија која е последица на некоја друга болест.
