Кандидијазата е инфекција предизвикана од габа наречена кандида. Оваа габа обично се наоѓа на кожата, во пределот на гениталиите и во дигестивниот систем и не е штетна, но во некои случаи премногу се размножува, предизвикувајќи осип, чешање и други симптоми.
Причини за кандидијаза кај деца
Габите нормално живеат на кожата, во дигестивниот систем (вклучително и во устата и грлото), на гениталиите, но во одредени околности се јавува инфекција. Ова се случува кога кожата е оштетена, таа е топла и влажна или кога детето има ослабен имун систем.
Во поретки случаи, кај посериозно болни деца, габите може да ги оштетат подлабоките ткива или крвотокот и да доведат до сериозни болести. Антибиотиците исто така можат да го поттикнат размножувањето на габите бидејќи ги уништуваат добрите бактерии кои го спречуваат прекумерното ширење на габите. И некои други лекови, како што се кортикостероидите, може да ја зголемат можноста за кандидијаза.
Кои деца имаат поголем ризик од кандидијаза
Некои деца се изложени на поголем ризик од кандидијаза поради:
- Топло, влажно време
- Премногу време помеѓу менувањето пелени
- Лоша хигиена
- Земање одредени лекови како што се антибиотици или кортикостероиди
- Здравствени состојби кои го ослабуваат имуниот систем
Симптоми на кандидијаза кај децата
Симптомите што се јавуваат кај децата може да варираат во зависност од тоа што е засегнато од инфекцијата. Најчестите симптоми се:
- Црвен осип, траги од кои тече проѕирна течност, мозолчиња, чешање или пецкање, ако инфекцијата ги зафати кожните набори или папокот
- Бел или жолт секрет, чешање, црвенило или пецкање, доколку инфекцијата влијае на женските гениталии
- Црвенило, лупење на кожата, болен осип доколку инфекцијата ги зафати машките гениталии
- Бели траги на јазикот и во устата, доколку инфекцијата ја зафати устата
- Мали рани или пукнатини во аглите на устата, кога габична инфекција ги зафаќа аглите на устата
- Оток, болка, гној, одвојување на ноктот од кожата, кога инфекциите со кандида ги зафаќаат ноктите
Симптомите слични на овие можат да бидат предизвикани и од некои други здравствени состојби, па доколку ги забележите кај вашето дете, задолжително посетете педијатар.
Лекување на кандида
Во повеќето случаи, кандидијазата е блага и добро реагира на лекови. Третманот зависи од тоа кој дел е зафатен со кандида инфекција, така што на пример кандидијазата на кожата се третира со гелови или креми, додека габичната инфекција на гениталиите се третира со супозитории.
Кандида во устата може да се третира со лекови за плакнења за уста или пастили.
Посериозните инфекции со кандида или инфекции кај децата кои имаат ослабен имун систем може да се третираат со антифунгални лекови земени орално или интравенозно, пишува nationalwidechildrens.org.
Компликации
Во ретки случаи, се јавуваат сериозни и опасни по живот компликации. Ова најчесто се случува кај деца кои имаат ослабен имун систем и инфекцијата влегува во крвотокот.
Превенција
Еве што можете да направите за да дејствувате превентивно кога станува збор за кандида кај децата:
- Трудете се да ја одржувате кожата на детето колку што е можно чиста и сува.
- Често менувајте му ги пелените.
- Користете антибиотици само кога е потребно, односно кога лекар ви препише.
- Научете го вашето дете на лична хигиена, како на пример како само да ги мие забите или да се капе.
Кога треба да одите на лекар?
Доколку ги забележите следните симптоми кај вашето малечко, не одложувајте да одите на лекар:
- Симптомите зафаќаат голема површина од телото
- Симптомите се влошуваат
- Забележувате знаци на инфекција на кожата, како што се зголемено црвенило, топлина, оток или течности
- Се појавуваат нови симптоми
