Убавото време едноставно повикува на одење во природа и секој со нетрпение очекува излети. Но, престојот во природа и бујното зеленило со себе носи и ризици од некои непријатности – каснувањата од инсекти секако се меѓу главните.
Каснувањата од крлежи се особено опасни, бидејќи носат ризик од инфекција што предизвикува Лајмска болест.
По враќањето дома проверете ја косата на сите членови на семејството, не само да децата. Детално проверете го и миленичето. Ако сепак сте пронашле крлеж на кожата, ваша или на детето, ова се најважните работи кои мора да ги направите.
ИЗВАДЕТЕ ГО ВЕДНАШ
Доколку сте воочиле крлеж на кожата важно е што побрзо да го извадите – ризикот од инфекција е поголем колку подолго крлежот е прицврстен. Полесно е да се отстрани во првите неколку часа по убодот.
Веднаш штом ќе забележите дека детето е каснато од крлеж, веднаш треба да го отстраните.
Доколку се грижите дали ќе можете успешно да го отстраните крлежот сами, најдобро е да го однесете вашето дете до најблиската амбуланта, каде што тоа се прави рутински и безбедно. Меѓутоа, ако не можете да го однесете вашето дете на клиника, можете сами да го отстраните крлежот.
Кај мало дете, прво можете да се обидете да ги отстраните крлежите користејќи едноставен и безбеден метод.
За ова ќе ви треба парче памук, топла вода и сапун.
- Потопете го памукот во топла вода со сапуница и ставете го на местото на каснување.
- Држете го памукот на тоа место околу 30 секунди
- Кога ќе гоа отстраните памукот, треба на него да се најде и крлежот.
Ако тоа не функционира, обидете се да го извлечете крлежот со пинцета.
- Земете пинцета и опфатете го крлежот, што е можно поблиску до кожата.
- Повлечете ја пинцетата нагоре, внимавајќи влечењето да биде еднолично, без мрдање или извртување. Ако делови од крлежот останат во кожата, не ги отстранувајте, туку оставете ги – сами ќе паднат.
- Исчистете го местото на каснување со алкохол или топла вода и сапун.
Туширањето со силен млаз вода веројатно е првата работа која интуитивно ќе ја направите ако ви се причини дека крлежот е под детската или вашата кожа. Ова е добра одлука ако навистина има крлеж кој се уште бара најдобро место на вашето тело на кое ќе се фати. Ако веќе е прицврстен, туширањето нема да помогне.
Бањата е идеално место на кое може да го направите прегледот на кожата ако се сомневате на крлеж. Прегледајте го со огледало секој сантиметар на кожата – од прегибите меѓу ножните прсти, до папокот и се до места на телото кои никогаш не биле изложени.
Не отстранувајте крлежи со масло, вазелин, лак за нокти, алкохол или кибрит. Ова може само да ги влоши работите, бидејќи крлежот може да навлезе подлабоко во кожата.
Како изгледа крлежот во кожата?
Крлежот додека се храни со крв изгледа како набрекнато зрно грашок со овална форма кое е закачено на кожата. Во зависност од видот, може да биде црн, кафеав, црвено-кафеав, сив или жолтеникав.
