Летото е период од годината кој изобилува со овошје и се смета за еден од најдобрите периоди за негово воведување во исхраната на бебето, секако зависно од возраста.
- На возраст од 6-8 месеци
ЈАБОЛКА
Квалитетна зрела, но не и презрела јаболка, е првото овошје кое му се дава на бебето. Достапна е во текот на целата година, а нејзиниот ефект на организмот на бебето е многу поволен: се внесуваат минерали (калиум), растителни влакна (пектин), а поволно делува и на работата на цревата на бебето.
За почеток се даваат само неколку лажички сварена јаболка, а потоа со тек на време, количината се зголемува. Вареното јаболко може да се додаде во речиси сите млечни оризови кашички, или оние со житарки.
БАНАНА
Содржи комплексни шеќери (скроб) кои полека ослободуваат енергија. Ова овошје е богато со калиум и затоа е корисно кога е потребно да се надомести овој минерал (по пролив или повраќање). Калиумот игра важна улога во минувањето на глукозата низ клеточната мембрана. Значаен е за правилно функционирање на нервниот систем и мускулите, а неговиот недостаток предизвикува слабост на мускулите.
КРУША
Содржи многу шеќери и влакна, па поволно делува на работата на бебепкиот дигестивен систем. Поради пријатниот сладок вкус, повеќето бебиња ја прифаќаат како прва кашичка по навршување на шестиот месец, а по осмиот се дава како иситнетно или изрендано свежо овошје.
СЛИВА
Овој вид на овошје, се препорачува кај бебињата кои се склони кон запек. На почетокот е најдобро да се варат и да му се даваат на бебето во форма на кашичка (претходно треба да се излупи), а подоцна може и свежи да се измелат во блендер и да му се понудат на бебето.
По осмиот месец, на бебето може да му се понуди кајсија и праска, а по првиот роденеден може да се почне со давање на сокови од јужно овошје (портокал, мандарина, лимон, грејпфрут). По 12. месец може полека да се почне и со воведување на киви и ананас.
