Доколку сте загрижени дека вашето бебе има премала телесна тежина, имајте предвид дека новороденчињата нормално губат 7–8 % (а понекогаш и до 10 %) од родилната тежина во првите неколку дена од животот, која ја надоместуваат до крајот на втората недела.
Сè до шестмесечна возраст, доенчињата треба да добиваат околу 450 г или повеќе секој месец. До крајот на првата година, тие обично тежат околу трипати повеќе од својата родилна тежина.
Овие бројки се просечни вредности, а здраво бебе може да има различно темпо на зголемување на тежината во зависност од родилната тежина, брзината на раст во должина и други фактори. Во секое време можете да разговарате со педијатарот за зголемувањето на тежината, на пример, за време на редовен систематски преглед.
Во зависност од возраста, различни намирници можат да му помогнат на вашето бебе да добие на тежина. Бебињата под 6 месеци треба да примаат мајчино млеко или формула, додека постарите деца можат да јадат намирници како овесна каша, авокадо и јајца
Ако вашето бебе има 6 месеци или повеќе и здравствениот работник исклучил медицински причини за бавното зголемување на тежината, како што се срцеви или дигестивни проблеми, размислете за воведување калорично богати, цели намирници. Тие можат да поттикнат здраво зголемување на телесната тежина.
ПОД 6 МЕСЕЦИ
Доените новороденчиња обично цицаат 8–12 пати во текот на 24 часа во првите неколку недели. Потоа, откако ќе се воспостави соодветно зголемување на тежината, некои бебиња може да цицаат поретко. Важно е да му дозволите на бебето целосно да ја испразни дојката. Ова се препорачува бидејќи последното млеко, кое доаѓа кон крајот на подојот, може да содржи повеќе масти од првото млеко, кое излегува на почетокот.
Исто така, избегнувајте носење тесни градници или маици. Овие видови облека можат да го попречат слободниот проток на млекото.
Лекарот може да ве праша за евентуални проблеми со фаќањето на брадавицата и да испита дали постојат некои основни медицински состојби што би можеле да влијаат на апсорпцијата на хранливи материи или на метаболизмот кај бебето на оваа возраст. Разговарајте со педијатарот доколку размислувате дали да го дополните доењето со формула или ако се прашувате која формула да ја изберете. Овие одлуки се сложени и зависат од многу лични фактори, а лекарот може да ви помогне да донесете информирана одлука. Можете да размислите и за разговор со советник за доење (лактациски консултант).
6–9 МЕСЕЦИ
Повеќето бебиња почнуваат да покажуваат подготвеност за цврста храна околу шестмесечна возраст. Разговарајте со здравствен работник за тоа кога да започнете со воведување на дополнителна, цврста храна. Обидете се да воведувате нови намирници една по една. На тој начин, доколку вашето дете има алергиска реакција, полесно ќе препознаете што ја предизвикало.
Авокадо
Авокадото може да биде добра преодна намирница за бебињата кои штотуку почнуваат со цврста храна. Здравите масти во авокадото, заедно со неговиот релативно благ вкус, го прават одлична намирница кога се обидувате да му помогнете на бебето да добие на тежина. Задолжително изгмечете го или направете пире пред да му го понудите на бебето.
Овесна каша
За да ја направите овесната каша соодветна за бебе, сомелете обични овесни снегулки сварени во вода, додавајќи вода по потреба за да се добие поретка, течна текстура. За да биде покалорична, можете да ја сварите и разредите со формула или мајчино млеко. Постепено можете да ја згуснувате како што бебето станува посигурно во јадењето.
Доколку забележите дека вашето дете одбива да јаде, изгледа летаргично или не ги достигнува развојните пресвртници, разговарајте со неговиот лекар. Тој може да ви помогне да најдете решение или да ве упати кај друг здравствен стручњак кој може да помогне
Овесот содржи бета-глукан, форма на растворливи диететски влакна, кои можат да помогнат во зајакнување на имунолошкиот систем на бебето. Овесната каша може исто така да помогне во намалување на воспалението и запекот. Овесната каша има неутрален вкус, што ја прави лесна за комбинирање со други заситувачки и здрави намирници. На пример, можете да додадете пире од овошје и цимет за повеќе вкус.
- Избегнувајте мед!
Иако можеби додавате мед во вашата овесна каша, никогаш не давајте мед на бебе под 1 година. Тоа може да го изложи на ризик од ботулизам и да претставува опасност од гушење.
Путер од кикиритки
Путерот од кикиритки содржи протеини и масти — и двете можат да придонесат за зголемување на телесната тежина кај бебето. Сепак, цели кикиритки не треба да се даваат, бидејќи претставуваат опасност од гушење.
Најновите докази поддржуваат воведување на намирници што често предизвикуваат алергии уште од шестмесечна возраст, вклучувајќи и путер од кикиритки. Истражувањата сугерираат дека овој пристап може да помогне во спречување на развој на алергии.
Важно е да внимавате на знаци на алергија, вклучувајќи:
- копривна треска (алергиска реакција на кожата),
- црвенило околу устата,
- свиркање при дишење.
Доколку се појави еден или повеќе од овие симптоми, веднаш побарајте медицинска помош.
Никогаш не му давајте на бебето путер од кикиритки директно од теглата, бидејќи тоа може да претставува опасност од гушење. Најдобар начин е да го разредите природниот путер од кикиритки, или кој било друг путер од јаткасти плодови со:
- топла вода,
- пире од јаболка,
- мајчино млеко или формула.
Ако веќе сте вовеле млечни производи, јогуртот исто така е опција.
Доколку вашето дете има поголем ризик од алергии или има историја на егзема, разговарајте со здравствен работник пред да му дадете путери од јаткасти плодови или други високоризични намирници. Тие може да препорачаат да почекате додека детето не порасне или да сакаат првото пробување да се случи под надзор во нивната ординација, или пак да предложат алерголошко тестирање.
Чести алергии на храна
Покрај кикиритките, најчестите алергии на храна вклучуваат:
- кравјо млеко,
- јајца,
- риба,
- школки, ракчиња,
- пченица,
- соја,
- јаткасти плодови.
Јајца
Изматените јајца можат да послужат како дополнителна храна за бебињата. Јајцата содржат докозахексаенска киселина (DHA), вид омега-3 масна киселина која е од суштинско значење за правилен развој на мозокот во раното детство.
9–12 МЕСЕЦИ
Риба
Не мора да чекате до 9-месечна возраст за да воведете риба, но на оваа возраст на бебињата обично им е полесно да се справат со нејзината текстура. Рибата е богата со протеини и здрави масти. Обидете се да избирате риба со ниска содржина на жива, како што се:
- лосос,
- харинга,
- пастрмка.
Овие, како и други видови риба, содржат и DHA. Можете да ја комбинирате рибата со сос од полномасен јогурт за дополнителни хранливи материи.
НАД 1 ГОДИНА
Кога бебињата ќе ја достигнат 12-месечната возраст, може да забележите дека јадат помалку. Тоа е затоа што нивниот раст забавува. Повеќето мали деца ќе добијат приближно 2,3 кг помеѓу првиот и вториот роденден.
Секако, тие и понатаму растат и сè уште им е потребна многу хранлива храна. Само не растат толку брзо како во првите 12 месеци од животот. Не грижете се ако вашето дете, кое претходно јадело одлично, одеднаш забави или стагнира во овој период. Ако и понатаму има енергија за игра и изгледа будно и активно, најверојатно сè е во ред.
Маслиново или авокадово масло
Вашето мало дете треба да внесува значителна количина здрави масти. Всушност, 30–40 % од дневните калории на детето треба да доаѓаат од масти. На оваа возраст им се потребни приближно 1.000–1.400 калории дневно. Тоа одговара на околу 30–50 грама масти на ден. Ако на вашето дете му е потребна малку поголема поддршка, размислете да додадете малку маслиново или авокадово масло во храната — за почеток околу 1/4–1/2 лажица (4–7 ml). Можете да го додадете во чинија со супа или хумус, или да натопите парче интегрален леб во маслото.
Внимавајте да не му давате премногу масло, бидејќи тоа може да предизвика стомачни тегоби или дијареја.
Дали треба да бидете загрижени за телесната тежина на вашето дете?
Доколку здравствениот работник не утврдил проблем со телесната тежина на вашето бебе, веројатно нема потреба од грижа. Имајте предвид дека бебињата родени предвреме, како и оние со посебни здравствени потреби, можеби нема да се движат според општите криви на раст.
Сепак, добра идеја е да ги искажете сите ваши грижи пред здравствениот работник на детето. Забележете што точно ве загрижува, со што е можно повеќе детали. На пример, можете да ги запишувате времињата, датумите, количините и видовите храна што вашето дете ги јаде.
Ако вашето бебе изгледа летаргично, одбива да се храни или не ги достигнува развојните пресвртници, треба да закажете преглед кај педијатар. Покрај медицинската проценка, тој може да ве упати и кај друг специјалист, како лактациски консултант, окупациски терапевт или нутриционист. (Healthline)
