Клучни точки
- Стрептококното воспаление на грлото е бактериска инфекција што ги зафаќа грлото и крајниците.
- Здравствените работници можат да направат брз тест за да утврдат дали болката во грлото е предизвикана од стрептокока.
- Ако тестот е позитивен, антибиотиците можат да помогнат детето побрзо да се почувствува подобро и да се спречи ширењето на инфекцијата.
- Доколку имате грижи или не сте сигурни дали симптомите се сериозни, консултирајте се со лекар.
Со почетокот на есента и враќањето на децата во училиштата и во градинките, започнува и сезоната на почести инфекции на грлото. Една од најчестите бактериски инфекции во овој период е стрептококното воспаление на грлото. Се јавува најмногу кај децата од училишна возраст, но може да ги зафати и возрасните. Блискиот контакт, споделувањето играчки, престојот во простории кои не се доволно проветрени, а во кои има повеќе деца овозможуваат побрзо пренесување на инфекцијата. Оваа инфекција е предизвикана од бактеријата Streptococcus pyogenes и може да предизвика болка во грлото, висока температура и општа малаксаност. Но важно е да се напомене дека секое болно грло не е последица на стрептокока – често причината се вируси.
Стрептококното грло е бактериска инфекција во грлото и крајниците. Повеќето болки во грлото ги предизвикуваат вирусите. Само кај околу 1 од 10 возрасни и 3 од 10 деца со болно грло причината е стрептокока
Симптоми
Обично се потребни 2 до 5 дена по изложеност за да се појават симптоми на стрептококно грло. Симптомите може да вклучуваат:
- Треска;
- Болка при голтање;
- Црвени и отечени крајници;
- Болно грло што започнало многу брзо и може да изгледа црвено;
- Отечени лимфни јазли во предниот дел на вратот;
- Мали, црвени точки на непцето, наречени петехии;
- Бели наслаги или линии од гној на крајниците.
Поретки симптоми, особено кај деца, може да вклучуваат:
- Главоболка;
- Мачнина или повраќање;
- Осип (скарлатина);
- Болка во стомакот.
Компликации
Компликации може да се појават по инфекција со стрептококно грло ако бактериите се прошират во други делови од телото. Компликациите може да вклучуваат:
- Апсцеси (џебови со гној) околу крајниците;
- Инфекции на уво;
- Постстрептококен гломерулонефрит (болест на бубрезите);
- Ревматска треска (болест што ги зафаќа срцето, зглобовите, мозокот, кожата);
- Инфекции на синуси.
Ризик фактори
Секој може да добие стрептококно грло, но некои фактори го зголемуваат ризикот.
Возраст
Стрептококното грло е почесто кај децата отколку кај возрасните.
- Најчесто: Деца од 5 до 15 години.
- Ретко: Деца помлади од 3 години.
Близок контакт
Близок контакт со друго лице со стрептококно грло е најчест ризик фактор за болест. На пример, ако некој има стрептококно грло, бактеријата често се шири кај другите луѓе во домаќинството.
Контакт со деца: Родителите на деца од училишна возраст и возрасните кои често се во контакт со деца се со зголемен ризик.
Стрептококната инфекција на грлото, предизвикана од бактеријата Streptococcus pyogenes од група А, се пренесува многу лесно — најчесто преку кашлање, кивање или близок контакт. Затоа е важно да се внимава на симптомите, особено кај децата
Пренатрупани места можат да го зголемат ризикот за добивање на која било инфекција со стрептокока од група А, вклучувајќи стрептококно грло. Такви места се: градинки и училишта, казнено-поправни установи, засолништа за бездомници, центри за воени обуки.
Причини
Стрептококното воспаление на грлото го предизвикува бактеријата од група А Streptococcus, која е многу заразна и лесно се пренесува преку кашлање, кивање или близок контакт со заразено лице.
Третман
Здравствените работници го лекуваат стрептококното грло со антибиотици.
Слични состојби: вирусно болно грло
Следните симптоми укажуваат дека причината за болно грло е вирус, а не стрептокока:
- Кашлица;
- Течење на носот;
- Промена на гласот (шепотлив, рапав или напнат);
- Конјунктивитис (црвено око).
Што значи да се биде носител на стрептокока?
Некои луѓе може да имаат позитивен тест за бактеријата стрептокока од група А, но да немаат симптоми. Дали тие се заразни? Дали им требаат антибиотици? Носител е лице кое има позитивен тест, но нема симптоми. Вообичаено, носителите не треба да земаат антибиотици. Тие имаат помала веројатност да ја пренесат бактеријата на други и многу мала веројатност да развијат компликации. (ЦДЦ)
