Сите идни мајки се борат со мачнини за време на бременоста, а вие го поминавте првото тримесечје без никакви знаци на мачнина или повраќање. Но, иако го немате тоа непријатно чувствo, можеби се прашувате дали со бебето е сè во ред и дали нешто не е во ред со вас?
Без грижа! „Речиси 30 проценти трудници воопшто немаат мачнини“, вели д-р Мишел Хакахa, гинеколог од Беверли Хилс. „И тоа дефинитивно е нешто за што треба да бидете среќни.“
Па, кои се тие среќнички што го избегнуваат повеќенеделното „забавување“ во бањата? Искрено – тоа може да биде било која жена. „Некои жени имаат утрински мачнини, а некои едноставно не. Некои немаат во првата бременост, но имаат во втората и обратно“, објаснува д-р Марa Френсис, гинеколог од Тексас. „Не секоја жена доживува утрински мачнини, исто како што не секој чувствува мачнина при возење.“
Можеби вашето тело е поотпорно, или пак подобро се справува со наглиот пораст на хормоните како бета-hCG, естроген и другите хормони што доминираат во првото тримесечје. Овие хормони брзо се зголемуваат во раните недели од бременоста и можат да предизвикаат метеж во желудникот. Откако ќе влезете во второто тримесечје, иако нивото на хормони сè уште расте, организмот полесно го поднесува тоа.
Кај мал процент жени, отсуството на утрински мачнини може да укажува на значително пониски нивоа на хормони и зголемен ризик од спонтан абортус. Но тоа ретко е случај – и нема причина за грижа ако немаш мачнини, сè додека твојот гинеколог смета дека хормоналните вредности се во рамките на нормалата. „Многу жени доаѓале кај мене во паника затоа што немале утрински мачнини и мислеле дека се под поголем ризик од абортус“, вели д-р Френсис и додава: „Ако немате мачнини, тоа не значи дека хормоните ви се абнормални, туку дека подобро ја толерирате бременоста.“
Сепак, немој премногу рано да се радувате! Дури и ако го поминете првото тримесечје без мачнини, не значи дека воопшто нема да ги имате. Иако повеќето жени ги доживуваат помеѓу 8. и 14. недела, секоја жена и секоја бременост се различни, па можно е „вашата доза“ да се појави малку подоцна.
За крај, ако сте без мачнини – сметај се за среќна и уживајте во фактот што низ она што многу жени го сметаат за најтешкиот дел од бременоста, вие минувате со многу помалку проблеми.
