Веќе е познато дека долготрајното и често користење на детска цуцла како последица може да има деформација на непцата и загризот. Неодамна научниците дошле и до заклучок дека децата кои користат цуцла повеќе од три години имаат поголема можност за развој на проблеми со говорот, од децата кои не користеле цуцла.
Поврзаноста на цуцлата со развојот на говор, според Дана Куталкова, стручњак за логопедија од Чешка, е во делот на деформацијата на вилицата, а на крајот и на загризот.
“Меката коска поради постојаниот притисок на цуцлата, се предава, и тоа посебно ако цуцлата нема правилен облик. Сето тоа може да предизвика и проблеми со изговорањето и шушкањето“, објаснува Куталкова.
Освен тоа, долготрајната употреба на цуцла може да влијае и на неправилна положба на јазикот или на поинаков начин на голтање.
Покрај умереното користење на цуцла, за правилен говор кај детето, клучна е и улогата на родителите и другите блиски личности. Затоа логопедите препорачуваат на детето од најрана возраст да му се зборува често и на разбирлив начин, со што помалку бебешки јазик.
