ЈАГОДИ
Јагодите се богати со витамини, а имаат и висок процент на железо, што ги прави корисни при анемија кај децата. Со оглед дека изобилуваат со витамин Ц, само осум јагоди дневно се доволни да ја задоволат дневната потреба за витамин Ц кај децата. Освен тоа содржат и калиум и растворливи пектински влакна, кои го елиминираат холестеролот. Најдобро е во исхраната на детето да се вклучат по првата година од животот, за да се избегне можна алергиска реакција. Треба да се воведуваат постепено, во мали количини и да се следи евентуалната појава на симптоми на алергија (црвенило и отоци).
ЦРЕШИ
Црешите се богати со биофлавоноиди, кои имаат значајни антиоксидантни својства. Содржат извесна количина на калиум и витамин Ц. Црешите се “највеселото“ овошје за децата. Тие се нискокалорични, а се богати со влакна, калциум, витамин Б (посебно со фолна киселина) и други антиоксиданти. Особено се богати со мелатонин (клучен за превенција за пореметувања на сонот, но и за оптимално функционирање на мозокот), феноли и кверцетин. Во исхраната на детето може да се воведат по осмиот месец од животот.
МАЛИНИ
Малините се вкусна и здрава храна, но на бебето може да му ги понудите по првиот роденден. Содржат големи количини на антиоксиданти и висок процент на влакна. Освен што се богати со манган, калциум и витамини од Б групата, количината на витамин Ц во една шолја малини е половина од препорачаната дневна доза на овој витамин кај децата.
ВИШНИ
Вишните од црешите се разликуваат во процентот на шеќер, а киселкастиот вкус се должи на органските киселини, главно јаболкова и лимонска. Во исхараната на бебето може да се воведат, како и црешите, по осмиот месец.
