Често можеме да видиме бенки на кожата на возрасните, но кога се појавува кај децата?
Понекогаш, иако ретко, децата можат да имаат бенки од раѓање, а најчесто тие почнуваат да се појавуваат на кожата по првата година од животот, а како што растат се појавуваат се повеќе.
Бенките се всушност израстоци на кожата кои се јавуваат кога пигментните клетки во кожата растат во кластери, наместо да се шират по целата кожа. Тие можат да се појават насекаде по телото, а ги карактеризира следниов изглед:
- Тие се кафеави, црни, розови или синикави
- Мали се, обично мазни и рамни, но можат да бидат и испапчени и да имаат влакна
- Тие се кружни или овални во форма и симетрични
Некои деца имаат по некоја бенка на телото, додека кај други деца се појавуваат повеќе бенки и тоа е сосема во ред. Тие се главно целосно безопасни и не се канцерогени, иако понекогаш може да дојде до развој на меланом, но ризикот е многу мал за децата и тинејџерите. Секако, не е на одмет да знаете во кој случај треба да го однесете вашето дете на лекар за да се прегледа одредена бенка:
- Ако бенката е асиметрична, односно едната половина е различна од другата
- Има нерамни рабови
- Не е со кружма или овална форма
- Бенката е со различна боја од другите бенки на кожата на детето
- Воспалена е повеќе од една или две недели
Редовната заштита на кожата од сонце, како во летните така и во зимските месеци, може да ја намали шансата за појава на бенки, но и за изгореници на кожата, што се заедно го намалува и ризикот од развој на рак на кожата во зрелата возраст.
Што влијае на појавата на бенки
Колку бенки ќе има детето зависи од повеќе фактори. Меѓу другото, тоа е и наследно, па ако вие или вашиот партнер имате многу бенки на вашата кожа, можно е да имаат и вашите наследници.
Исто така, децата со посветла кожа обично имаат повеќе бенки од оние со потемна кожа, а освен тоа, некои ретки генетски состојби се поврзани со голем број бенки на кожата.
