Ниту еден родител не е совршен, ниту еден метод на родителство не дава 100 проценти резултати. Некои методи, кои се сметаа за многу ефикасни, подоцна покажаа многу слаби точки. Воспитувањето е процес, всушност запознавање на детето и родителите преку различни животни предизвици, меѓусебно почитување и љубов на дневна основа, а во тој процес не се менуваат само децата туку и родителите.
Добро е кога во воспитно-образовниот процес родителите се отворени да ги спознаат своите грешки, а за да ви помогнеме да ги согледате, донесуваме девет работи за кои е докажано дека имаат лоши последици на долг рок.
Дисциплинирање пред други
Ако сакате јавно да му одржите лекција на детето, не само што ќе го понижите детето пред сите, туку нема ни да слушне што сакате да му кажете затоа што ќе размислува кој се може да го слушне вашиот разговор и што околината ќе мисли за него.
Испраќање неразбирливи и нејасни инструкции
Кога му поставувате граници на однесувањето на вашето дете, бидете јасни за тоа. Во исто време, почекајте го одговорот за да се уверите дека детето точно разбрало што е дозволено, а што не.
Поткуп со награди
Ако мислите дека ќе го убедите детето да се однесува на одреден начин со ветувања или награди, откажете се од овој метод. Всушност се работи за поткуп, а единственото нешто што можете да го добиете за возврат е вашето дете да ја научи вештината на манипулација и со своето однесување да добие се што сака од вас.
Игнорирање на знаци на глад и замор
Ако забележите дека неприфатливото однесување на детето е резултат на замор или глад, одложете го дисциплинирањето. Смирете го детето и прво задоволете ги неговите потреби. Кога ќе биде сито и одморено, вратете се на темата.
Премногу долги објаснувања
Кога сакате да му објасните на детето што згрешило, изберете кратки и јасни реченици и не правете вашето објаснување да трае вечно.
Викање на детето
Децата не можат да прифатат лекција ако им викате. Или се повлекуваат во себе или се лутат и целата ситуација излегува од контрола. Решавајте ги проблемите со мирен и трпелив тон иако детето плаче, вика и се фрла на под, а по неколку месеци и вие и детето ќе бидете посмирени и повнимателни.
Споредување на детето со други деца
Нема ништо полошо за детето од тоа да се споредува со други, без разлика дали се негови врсници или браќа и сестри. Наместо тоа, посочете го доброто однесување на вашето дете и пофалете го.
Поставување казни кои се неодржливи
Не наметнувајте му на вашето дете нереални казни кои не можете да ги одржите. Затоа што, вие сте донеле таква казна во афект, а со тоа само му кажувате на детето дека не треба да ве сфаќа сериозно.
Недоследност во правилата
Со недоследно спроведување на правилата, со вашиот пример му покажувате на детето дека правилата не треба да се почитуваат, а потоа кога ќе ги поставите, нема да ги почитува ниту тоа.
