Студија од Велика Британија покажа дека лицата со коинфекција на грип и COVID-19 обично имаат полоши исходи. Поточно, тие имале двојно поголем ризик од смрт во споредба со пациентите заразени само со COVID-19
Коронавирусот се шири низ целиот свет, а во исто време полека почнува и сезоната на грип. Иако експертите сè уште се надеваат дека благодарение на мерките преземени во борбата против COVID-19, ќе го намалат и бројот на заболени со грип, сепак, не треба да се опуштате премногу.
Обично грипот го достигнува својот врв дури околу февруари, така што се уште има доволно време да добие на интензитет и да ги здружи силите со COVID-19.
Како што предупредуваат експертите за инфективни болести, твиндемијата (двојна епидемија) би предизвикала уште поголем притисок врз здравствените системи ширум светот, кои и онака се пред колапс. Значаен дел од популацијата може да се разболи од овие инфекции во рок од неколку недели или месеци, а некои луѓе би можеле да ги добијат и двете инфекции истовремено.
Неколку лица во САД, Велика Британија и Кина веќе се коинфицирани со коронавирус и грип. Иако податоците за тоа на кој начин вирусите комуницираат еден со друг и како заедно влијаат на организмот се сè уште ограничени, раните докази сугерираат дека оние кои истовремено ќе заболат од COVID-19 и грип, се соочуваат со потешки влошувања на здравствената состојба.
Првото што треба да се знае за коинфекција со коронавирус и грип е тоа дека е можна затоа што двата вируси се врзуваат за различни делови од телото. Односно, тие не се натпреваруваат еден со друг во однос на заразувањето на нашите клетки.
Коинфекциите често доведуваат до полоши резултати
Постои општо уверување дека истовремената инфекција со COVID-19 и грип може да биде фатална.
Метју Хајнц, интернист кој лекувал пациенти со COVID-19 во Аризона, вели дека третирал голем број пациенти кои во минатото имале коинфекции со грип и други вообичаени коронавируси.
„Овие луѓе изгледаат полошо, звучат полошо, им треба повеќе време да се опорават“, изјави Хајнц за HuffPost.
Првичните податоци сугерираат дека истото важи и за COVID-19. Студија од Велика Британија покажа дека овие лица обично имаат полоши исходи. Поточно, тие имале двојно поголем ризик од смрт во споредба со пациентите заразени само со COVID-19. Исто така, најверојатно ќе бидат примени на одделот за интензивна нега и ќе им треба респиратор. Истражувачи од Кина и Иран објавија слични откритија.
Понатаму, грипот може да му наштети на телото слично на COVID-19 – и обете инфекции предизвикуваат намалено ниво на кислород во крвта, респираторни проблеми и воспаленија.
„Навистина сите соеви на на грип и SARS-CoV-2 се потенцијално многу, многу смртоносни инфекции“, рече Винслоу.
Се очекува ризикот да биде поголем кај луѓето кои се поосетливи на секој вирус – како што се постарите возрасни лица и луѓето со други здравствени проблеми како што се дебелина, рак и белодробни заболувања.
Но, лекарите сè уште собираат податоци за коинфекциите. Бидејќи сезоната на грип само што започнува, истражувачите се сомневаат дека коинфекциите се потценети.
