Според последните податоци, денес во светот има 3,905 милијарди припаднички на женски пол, што претставува 49,58% од светската популација. Оттука произлегува дека мажите во помал процент се побројни од жените. Истражувањата спроведени во текот на стотици години покажуваат дека секогаш има повеќе момчиња отколку девојчиња. Се шпекулира дека ова е природен начин на спротивставување на релативно високите стапки на смртност кај мажите и начин да се создаде поголема рамнотежа меѓу половите во популацијата.
Историски гледано, во светот обично се раѓале околу 105 момчиња на секои 100 девојчиња. Но, во раните 2000-ти, уделот на момчињата се зголеми. Ваквото зголемување на соодносот на половите главно е предизвикано од големиот број деца родени во Кина. Непропорционално голем удел на момчиња е забележан и во други земји низ Азија и Кавказ. Азербејџан, Ерменија, Грузија, Јужна Кореја и Соломонските Острови се местата со најголема разлика во односот на половите во корист на момчињата.
Индија извесен период беше изедначена со Македонија, Црна Гора, Папуа Нова Гвинеја, Самоа, Србија и Суринам со сооднос од 108 родени момчиња на секои 100 девојчиња. Од друга страна, шесте земји со најмала разлика помеѓу половите се Руанда, Сиера Леоне, Того, Зимбабве, Брегот на Слоновата Коска и Мадагаскар.
Како да се објаснат овие разлики во уделот на момчиња и девојчиња?
Можеби најпознатата причина, според Истражувачкиот центар Пју, е поврзана со практикувањето на полово селективен абортус, кој е забележан во Азија, но и на Кавказ. Можноста за рано одредување на полот на фетусот и силната претпочитаност за машки деца е во голема мера одговорна за високиот број на момчиња во многу земји во овие региони. Некои истражувања сугерираат дека процентот на новородени момчиња се намалува со возраста на родителите, т.е. колку се постари родителите, толку е поголема веројатноста тие да имаат девојче, но и високиот процент на девојчиња во субсахарска Африка исто така може да биде поврзан со практиката на полигамија.
