Православните верници за време на велигденските празници се кршат со јајца кои се сварени и бојадисани на Велики четврток или сабота. Во многу семејства се подготвуваат повеќе отколку што е потребно, па се случува да помине Велигден и да останат 10-20 варени јајца.
Колку долго е безбедно да ги јадете и да им ги давате на децата по Велигден?
Иако некои веруваат дека велигденските јајца кои се бојадисани на Велики четврток не можат да се расипат, експертите имаат многу јасни насоки за тоа колку долго по готвењето може да се јадат сварени и бојадисани јајца.
Имено, експерти од Американското здружение за агрокултура на својата веб-страница истакнуваат дека варените јајца чувани во фрижидер може да се јадат во следните седум дена, без разлика дали се чуваат во фрижидер излупени или со лушпа. Она што е важно е јајцата да ги ставите во фрижидер во рок од два часа по варењето и откако ќе ги извадите од фрижидер, да не ги оставите на собна температура повеќе од два часа пред да ги јадете.
