Одлуката дали жената ќе дои или не е една од најважните по породувањето. Покрај бројните придобивки за бебето, како што се помал ризик од обезност и подобри когнитивни способности, доењето носи извонредни здравствени придобивки и за мајката.
Една од клучните придобивки од доењето за мајките е зголемената потрошувачка на калории. Производството на млеко започнува околу 24 часа по породувањето. Само 30 грама мајчино млеко содржат повеќе од 20 калории, а бебе кое се храни исклучиво со мајчино млеко во просек консумира околу 700 грама млеко дневно во првите шест месеци од животот.
Во просек, тоа значи дека доењето троши околу 500 дополнителни калории дневно. Оваа бројка може да биде повисока ако бебето јаде повеќе, или пониска ако има помал апетит. Американската асоцијација за бременост проценува дека новите мајки трошат дополнителни 425 до 700 калории дневно во процесот на доење.
Брзо губење на килограмите по породувањето
Зголемената потрошувачка на калории често доведува до видливо и побрзо слабеење, особено во комбинација со здрав начин на живот. Едно истражување покажало дека мајките кои дојат губат двојно повеќе килограми во првата година по породувањето во споредба со оние кои не доеле – 4,9 килограми наспроти 2,17 килограми.
Друга понова студија, во која учествувале 30.000 жени, открила дека просечните 11 килограми добиени во бременоста можат да се изгубат во рок од шест месеци по породувањето исклучиво со доење.
Но, придобивките од доењето не завршуваат со трошењето калории. За време на доењето се ослободува окситоцин, хормон кој предизвикува контракции на матката. Овој хормон е клучен за време на породувањето, а по него помага матката побрзо да се врати на големината што ја имала пред бременоста, што придонесува и за затегнување на средишниот дел од телото.
Покрај тоа, сè повеќе докази покажуваат дека жените кои дојат имаат понизок ризик од кардиоваскуларни заболувања, гинеколошки карциноми, па дури и дијабетес, во споредба со мајките кои не доеле.
