Одлуката за тоа дали жената ќе дои или не, е една од најважните кога ќе се породи. Покрај бројните придобивки за бебето, вклучително и помал ризик од обезност и подобри когнитивни способности, доењето има неверојатни предности за мајката.
Една од важните придобивки од доењето за мајката е потрошувачката на калории. Женските гради всушност стануваат фабрика за млеко за време на бременоста,а своето производство го почнуваат 24 часа по породувањето. 30 грама мајчино млеко содржи над 20 калории, а бебе кое е исклучиво доено, во првите шест месеци од животот во просек консумира по 700 грама млеко дневно. Звучи збунувачки?
Во просек, тоа значи дека мајката што дои троши 500 дополнителни калории дневно. Оваа бројка е поголема ако доенчето јаде повеќе или помалку ако има намален апетит. Американското здружение за едукација во бременоста, проценува дека новите мајки согоруваат дополнителни 425 до 700 калории на ден во процесот на доење.
Брзо губење на тежината по породувањето
Дополнителното трошење на калории обично доведуваат до видливо и брзо губење на тежината во комбинација со здрав начин на живот. Една студија покажала дека новите мајки кои доеле изгубиле двојно повеќе килограми во првата година по породувањето во споредба со мајките кои не доеле – 4,9 килограми во однос на 2,17 килограми. Уште едно неодамнешно истражување, во кое учествувале 30.000 жени, открило дека 11-те килограми добиени за време на бременоста може да се изгубат за шест месеци по породувањето исклучиво со доење.
Меѓутоа, не е сè до калориите и доењето. Освен што согорува калории, доењето може да го затегне и средниот дел од телото благодарение на окситоцинот, хормон кој се ослободува за време на доењето. Окситоцинот предизвикува контракции на матката и е многу корисен за време на породувањето. А по раѓањето, окситоцинот ослободен за време на лактацијата помага да се намали матката до нејзината големина пред бременоста. Исто така, новите докази покажуваат дека жените кои дојат имаат помали стапки на кардиоваскуларни болести, гинеколошки карциноми, па дури и дијабетес во споредба со мајките кои не доеле.
