Секое бебе е различно и секогаш е најдобро родителите да ги следат потребите на своето дете, но особено на почетокот, додека не го запознаете вашето бебе и не влезете во рутина, тоа може да биде доста тешко. Многу мајки во првите денови, па дури и месеци се грижат дали детето јадело доволно и затоа треба да имаат некои рамковни параметри или сигнали кои ќе им помогнат да знаат дека бебето е сито.
Ова се неколку корисни совети за да бидете сигурни дека вашето бебе доволно изело, без разлика дали се храни со мајчино млеко или формула.
Колку пати дневно да јаде новороденче
Експертите генерално препорачуваат доење на барање, на што потсетуваат и педијатрите Алесандро Волта и Чиро Капуано.
„Добро е и здраво ако бебето може да цица кога сака и има потреба за тоа. Нема потреба да се следи колку минимално време треба да помине помеѓу две хранења“.
Доењето на барање ќе помогне и во производството на количеството млеко кое му е потребно на бебето, бидејќи цицањето го поттикнува производството на ново млеко. Затоа, особено во првите недели, важно е да не поминува многу време помеѓу хранењата, за да се воспостави оптимално производство на мајчиното млеко.
Гледајќи некој просек, бебињата обично јадат помеѓу осум и 12 пати на ден, а некои дури и 15 пати во текот на денот (приближно на секој час и половина). Педијатрите Волта и Капуано истакнуваат дека некои бебиња сакаат да јадат почесто по малку, додека други претпочитаат малку повеќе време помеѓу хранењето.
Дали треба да го разбудите бебето за да јаде?
Советничката за доење Кјара Лоса вели дека дури и кога станува збор за тоа дали треба да го будите вашето бебе да јаде, нема универзален одговор.
„Генерално, може да се каже дека ако во текот на денот бебето може да покаже јасни знаци на глад и да мајката може да ги задоволи овие потреби на бебето, во ред е да помине четири до пет часа помеѓу хранењето. Меѓутоа, ако бебето баш и не покажува знаци на глад или е прилично поспано, добро би било да го будите на секои два до три часа“, вели советничката.
Колку долго треба да се дои бебето на едната града?
Уште едно од прашањата кое често ги мачи мајките е колку долго бебето треба да цица од едната града и дали е неопходно да во текот на секој подој цица на двете дојки. Педијатрите Волта и Капуано велат дека нема правила.
„Некои бебиња сакаат да јадат само од едната дојка (во овој случај, мајката го става детето на другата дојка при следното доење), други сакаат да се хранат од двете гради за време на доењето, можеби по кратка пауза“, велат лекарите.
Колку бебето треба да изеде во еден оброк?
Многу е тешко да се одреди точно колку млеко внесува доеното бебе во текот на денот. Количината на млеко кое му е потребно на бебето постојано се менува, односно детето јаде повеќе кога има скок во развојот.
Исто така, не е невообичаено бебињата почесто да цицаат кога надвор е топло, па затоа е важно мајките да имаат доверба дека нивните деца внесуваат млеко колку што им е потребно.
Колку млечна формула внесува бебето?
На пакувањата млечни формули за бебиња има препорачани количини според возраста или тежината на детето, но имајте на ум дека тоа се просечни дози и дека на некое бебе ќе му биде малку, а на некое многу.
Па, како да пресметате колку млеко му треба на бебето? Следната шема ќе ви помогне, прво обрнете внимание на бројот на оброци дневно:
- Бебе до три месеци: шест оброци на ден, на секои три и пол часа
- Четиримесечно бебе: пет хранење дневно, на секои четири часа
- Шест и седуммесечно бебе: четири оброци на ден, на секои шест часа
Кога станува збор за количината на млеко, еве ги рамковните мерки:
- Во првата недела од животот на бебето, започнете со околу 10 милилитри по оброк, па таа доза зголемете ја по 10 милилитри дневно, додека не достигнете оброк од 70-80 милилитри.
- Во првиот месец од животот, односно по првата недела, бебињата во просек внесуваат околу 100 милилитри по оброк
- Во вториот месец од животот просекот е околу 110-120 милилитри по оброк
- Во третиот и четвртиот месец, бебињата консумираат околу 140-150 милилитри по оброк
- Во петтиот и шестиот месец на малечките им требаат отприлика околу 200-250 милилитри по оброк.
Како да знаете дали бебето јаде доволно?
За да бидете сигурни дека бебето јаде доволно, најважно е да го следите неговото расположение и напредок, а може да помогнат и следните знаци:
- Бројот на влажни пелени треба да биде најмалку пет или шест во текот на денот
- Бебето добро напредува – општата препорака е дека новороденчето треба да добива 150-200 грама неделно во првите три месеци и 100-150 грама неделно помеѓу третиот и шестиот месец.
- Бебето е активно – љубопитно, среќно, расположено
Знаци кои покажуваат дека бебето е сито
Кога станува збор за самиот чин на хранење, ќе ви помогне да ги препознаете сигналите што вашето бебе ги испраќа за да ви каже дека е сито во тој момент:
- Го одбива шишето или градата
- Заспива за време на хранењето
- Ја движи главата лево-десно за да одбие шише или града или ја држи устата затворена
