Кога се преселуваме во нов град или прифаќаме нова работа, секогаш е потребно извесно време пред да ни биде удобно во нова средина или во новата улога. Понекогаш големите промени ги оставаат дури и најподготвените и најспособните луѓе во чувство на „синдром на измамник“ со мислата: „Немам поим што правам“.
Мајчинството е можеби најголемата промена низ која многумина од нас поминуваат во животот и сосема е нормално да се чувствувате како да не знаете што правите на почетокот.
Истражувањето објавено во научното списание „Sexual and Reproductive Healthcare“ покажало дека потребни се шест месеци за новите мајки да стекнат самодоверба и да се чувствуваат како да го совладале мајчинството.
„Околу 25 проценти од новите мајки поминуваат низ период на ниска мајчинска самодоверба, лошо мајчинско расположение и висок родителски стрес; меѓутоа, кај повеќето мајки, самодовербата, расположението и стресот значително се подобруваат шест месеци по раѓањето на нивното дете“, пишуваат авторите на студијата.
Значи, ако се чувствувате како да не знаете што правите – не сте сами и знајте дека ова чувство наскоро ќе исчезне. Може да биде 14 недели, четири или шест месеци од сега, но ќе стане полесно. И ако тој ден ви се чини премногу далечен, не плашете се да побарате помош.
Во ред е да се биде нов во нешто. Не започнуваме нова работа очекувајќи да знаеме сè по првиот ден, ниту пак одиме на нашиот прв час по јога мислејќи дека веднаш ќе се свиткаме како човечко ѓеврече. Потребно е време за да се чувствувате удобно и потребна е пракса за да станете вешти. Мора да смените неколку пелени на дневна светлина за да можете да ги менувате во темница ноќе.
