Медицината оваа состојба ја дефинира како наследно или стекнато пореметување на хемостазата, кој предиспонира или го зголемува ризикот од појава на тромбоза. Тромбофилијата доведува до неконтролирана коагулација или згрутчување на крвта, а може да се јави и во бременоста, особено кај лицата со генетска склоност.
Самата бременост претставува тромбофилна состојба. За време на нормална бременост се менува концентрацијата на протините на плазмата вклучени во процесот на коагулација, и со самото тоа се пореметува рамнотежата која постои помеѓу прокоагулантниот и антикоагулантниот систем. На овој начин, со физиолошките механизми се намалува ризикот од губење на крв во бременоста и за време на породувањето, но се зголемува ризикот од појава на тромбоза.
За време на бременоста доаѓа до пораст на речиси сите фактори на коагулација, а освен тоа и физичките промени кои се случуваат за време на бременоста, доведуваат до зголемена склоност кон тромбоза.
Пропратните болести, како што се системски еритемски лупус, како и дполнителни ризик фактори меѓу кои се дебелината, имобилизацијата, возраста на бремената жена и пушењето, го зголемуваат ризикот од тромбоза.
Се заедно, и физиолошките и анатомските промени кои се јавуваат за време на бременоста, доведуваат до зголемен ризик за тромбоза, која трае и по породувањето, до околу шест недели потоа.
