Креативноста е всушност нешто што се крие во секое дете. Сепак, на секое дете му треба добра средина и поддршка за да може да ја изрази својата креативност. Како родител, пред се треба да го научите детето да ја цени уметноста, а потоа да се обиде да се изрази на начин што се смета – креативен, по негов личен избор. Иако се верува дека одредени деца се повеќе надарени за уметност, а некои помалку, во секој од нас лежи одредена доза креативност. Тоа е вештина што може да се развие и има потреба од вежбање.
Поттикнете градење самодоверба кај детето
Многу деца се плашат да испробуваат нови работи. Стравот од неуспех често го кочо нивниот уметнички процес. Затоа е важно да се создадат можности, односно средина во која детето ќе се чувствува доволно слободно да ризикува, даз греши и да учи од своето искуство. Покажете му со ваш пример дека е сосема во ред да се биде поинаков, да се гледаат работите поинаку и да се прават грешки.
Управувајте со неговиот стрес
Хоби и различни видови работилници од музички, поетски, сликарски до вајарство се совршен начин децата да дојдат во контакт со своите емоции и да ги изразат. Децата можеби и не сфаќаат што навистина се случува, но еден нивен цртеж може да каже повеќе од стотина зборови. Кога ќе научи како да ги отпушти негативните емоции наместо да ги задржува, детето има можност да биде слободно и многу креативно.
Помогнете му да развие когнитивни вештини
Креативноста вклучува размислување, како и создавање работи. Речиси ништо не е покорисно за детето од поттикнување на креативноста. Без разлика дали ќе му дадете во рака хартија и бои или коцки, детето учи како да ги развива своите вештини за решавање проблеми и размислување, потпирајќи се на иновативност и грешки од минатото.
Бидете горди на неговата работа
Децата очајно сакаат да бидат доволно добри во очите на своите родители. Нивната фантазија е доволно бујна и тие би сакале да ја искористат, но се плашат дека вам нема да ви се допадне она што го нацртале, напишале или направиле. Ако некогаш сте запоставиле некоја нивна работа, обидете се повеќе да не го сторите тоа. Бидете горди на сè што прават, бидејќи само вашите пофални зборови е се што им треба за полет.
Овозможете му на детето да си игра без ограничувања
Иако е убаво за детето да има добро испланиран ден, со активности во градинка или училиште, како и спортски тренинзи, она што не треба да заборавите е дека тоа сè уште е само дете. Тоа значи дека му треба и слободно време за игра. Дозволете му да игра без ограничувања, за да може само да истражува и да открива што го интересира.
