Книгите се заменија со ТВ екрани, интернет платформите станаа тетратки и учебници, а домашните задачи се преселија на Вибер групите.
На кој начин ваквото следење на наставата и нужното поминување на време пред екраните влијае на видот на детето, откриваат офталмолозите.
“Децата, во изминатите повеќе од два месеци, колку што трае коронавирусот, многу повеќе седат пред телевизор од проста причина што мора да ја следат наставата. Но, јас не сум на мислење дека гледањето телевизија или играњето игри значајно го менува диоптрискиот статус кај детето. За да дојде до влошување на односот помеѓу очите, мора да постои одредена основа, па до влошување може да дојде и ако детето држи книга и ако држи таблет. Разликата меѓу книга и таблет е во тоа што децата главно на таблет или телефон гледаат интересни содржини, па поретко трепкаат. Од друга страна, доколку е лошо осветлувањето во собата, тогаш таблетот е во предност пред книгата, бидејќи постои позадинско осветлување благодарение на кое детето гледа подобро. Не сум некој кој ги застапува машините – мислам дека и за возрасните и за децата подобро е повеќе време да поминуваат во природа, отколку со електронски уреди, но тие уреди денес носат голем број на информации и ако ги користиме за учење, а не толку за играње, тогаш во таа ситуација може да бидат многу корисни“, смета специјалистот офталмолог д-р Милорад Љутица.
Од друга страна, објаснува офталмологот, доколку детето минува многу време користејќи телефон близу очите, може да настапи одреден грч на фокусирање и како последица да има заматен вид, повремена мала конфузија, двојна слика, солзење на очите.
“Доколку детето пред телевизор или таблет/телефон поминува до два часа дневно во текот на целиот ден, тоа е прифатливо. Им предлагам на родителите да ја бираат содржината и на тој начин да прават некој вид на компромис“, советува д-р Љутица.
