Нова студија го обезбедува досега најубедливиот доказ дека вирусот САРС-КоВ-2 навлегува во човечкиот мозок, каде што ги инфицира клетките наречени астроцити, кои обезбедуваат метаболичка поддршка на невроните.
Според пишувањето на списанието PNAS, научниците истражувале како патогенот го менува метаболизмот на овие клетки, предизвикувајќи лачење на соединенија кои ја нарушуваат виталноста на невроните и на крајот доведуваат до невронска смрт, пренесува „IFL Science“.
Астроцитите обезбедуваат метаболичка поддршка на невроните, снабдувајќи ги со енергија што им е потребна за да функционираат. Анализата на протеините изразени од астроцити инфицирани со SARS-CoV-2 открила клучни метаболички промени, вклучително и намалување на производството на лактат, што е од суштинско значење за активност и преживување на невроните
„Невролошките симптоми се меѓу најчестите компликации на Ковид-19, надвор од белите дробови, кои погодуваат повеќе од 30 отсто од пациентите“, пишуваат авторите.
Сепак, до сега остана нејасно дали овие ефекти се резултат на системски промени предизвикани од вирусот или директна инфекција на мозокот и централниот нервен систем (ЦНС).
За да го истражат ова, авторите на студијата започнале со евалуација на 81 лице кое страдало од благи симптоми на Ковид-19 без потреба од хоспитализација.
Во споредба со 81 здрави луѓе од контролната група, овие учесници покажале повисоки нивоа на анксиозност и депресија и поголема атрофија во мозочниот регион наречен орбитофронтален кортекс, кој претходно беше поврзан со анксиозни нарушувања.
За да утврдат како вирусот предизвикува уништување на мозочните клетки во оваа клучна структура, тимот анализирал примероци на мозочно ткиво од 26 луѓе кои починале од компликации поврзани со Ковид-19.
Вирусот САРС-КоВ-2 е пронајден во астроцитите на пет лица, што ги натерало авторите на студијата да помислат дека патогенот можеби бил присутен во мозокот на останатите 21 лице, и покрај тоа што не бил откриен во малите примероци кои биле користени за студијата.
Астроцитите обезбедуваат метаболичка поддршка на невроните, снабдувајќи ги со енергија што им е потребна за да функционираат. Анализата на протеините изразени од астроцити инфицирани со SARS-CoV-2 открила клучни метаболички промени, вклучително и намалување на производството на лактат, што е од суштинско значење за активност и преживување на невроните.
Врз основа на ова, истражувачите наведуваат дека „инфекцијата SARS-CoV-2 предизвикува невротоксичен секреторен фенотип во астроцитите што доведува до зголемена смрт на невроните“.
Тимот отишол и чекор понатаму во својата истрага и се обидел да утврди како вирусот ги инфицира мозочните клетки. Во белите дробови, САРС-КоВ-2 ги инфицира клетките користејќи го својот шилест протеин за да се прикачи на рецепторите наречени ACE2 рецептори.
Истражувачите откриле дека шилестиот протеинот цели на различен рецептор, познат како NRP1, за да ги инфицира астроцитите. Кога NRP1 рецепторите биле блокирани со неутрализирачки антитела, вирусот ја изгубил својата способност да ги нападне овие клетки.
„Нашите наоди се во согласност со моделот во кој САРС-КоВ-2 може да допре до централниот нервен систем на пациенти со Ковид-19, да ги инфицира астроцитите преку NRP1 интеракција и секундарно да ја наруши функцијата и одржливоста на невроните“, пишуваат авторите на студијата.
Тие понатаму наведуваат дека „овие карактеристики би можеле да ги објаснат оштетувањата и структурните промени забележани во мозокот на пациентите со Ковид-19“.
