Ново истражување, објавено во реномираното медицинско списание „Лансет“ открива дека само 0,65 проценти од луѓето биле по втор пат позитивни на Ковид-19, откако претходно биле заразени за време на првиот и вториот бран на пандемијата во Данска. Тоа е многу пониско од 3,27 проценти колку што биле позитивни на вирусот по употреба на многу попрецизните PCR тестови, откако претходно биле негативни на брзиот тест.
Овие податоци потврдуваат дека можеби нема да можеме да ги исполниме очекувањата за стекнување на заштитен имунитет против SARS-CoV-2 по пат на природни инфекции и дека трајно решение е глобална програма за вакцинација со високо ефикасни вакцини
Но, студијата утврдила и дека луѓето постари од 65 години имаат само 47 проценти заштита од повторување на инфекцијата, во споредба со 80 проценти заштита кај помладите луѓе.
„Нашата студија го потврди она што многу други студии го сугерираа: повторната инфекција со Ковид-19 е поретка кај помлади, здрави луѓе, но кај постарите луѓе е поголем ризикот да ја добијат повторно“, рече Стин Етелберг од данскиот институт „Статенс Серум“.
„Бидејќи постарите луѓе имаат поголема веројатност да имаат посериозни симптоми на болеста, и за жал да умрат, нашите откритија јасно даваат на знаење колку е важно да се применуваат политиките за заштита на постарите за време на пандемија“, се додава во студијата.
Авторите на студијата не утврдиле дека заштитата од повторна инфекција паѓа за време на шест месеци од болеста, но посочуваат дека се потребни дополнителни студии за да се утврди заштитата од повторна инфекција кај различни варијанти на вирусот.
„Овие податоци потврдуваат дека можеби нема да можеме да ги исполниме очекувањата за стекнување на заштитен имунитет против SARS-CoV-2 по пат на природни инфекции и дека трајно решение е глобална програма за вакцинација со високо ефикасни вакцини“, велат авторите на истражувањето, пренесува „Хина“.
