Возрасните често го прескокнуваат појадокот, брзајќи на работа, па првиот оброк им е само кафе. Сепак, за децата во развој таа навика може да биде погубна. Појадокот е неприкосновен, бидејќи им ја дава потребната доза енергија на почетокот на денот, го подобрува помнењето, допринесува за подобро расположение и сфаќање на материјалот во училиште.
Децата и тинејџерите кои го прескокнуваат, односно го одложуваат првиот оброк имаат полоши резултати на тестовите, а ужината никако не е замена за појадок или ручек.
Исхраната секогаш треба да биде урамнотежена и разновидна, а посебно во периодот на развој, оти се потребни многу намирници за да се задоволат сите потреби на организмот. За нормално функционирање, подеднакво важни се протеините, мастите и јаглехидратите, како и витамините и минералите.
Оброк богат со јаглехидрати треба да се јаде два до четири часа пред тренинг, додека ужина во вид на банана се препорачува еден час пред физичка активност.
Мастите се важен извор на енергија, а истовремено ја олеснуваат и апсорпцијата на витамини кои се растопуваат во масти – А, Д, Е и К. Од намирниците, особено значајни се полномасното млеко, сирење, путер и свинска маст, како и течни масла, меѓу кои најздраво е ладно цеденото маслиново масло.
Течноста е неопходна за добро функционирање на клетките. Важно е децата да испијат најмалку пет чаши вода дневно. Во спротивно, може да почувствуваат главоболка, поспаност и замор.
Витамините и минералите се од огромно значење на имуниот систем и за целокупното здравје на организмот. Најмногу ги има во овошјето и зеленчукот, па затоа е важно децата да ги внесуваат низ пет оброка дневно. Хранливата ужина може да биде чаша свежо цеден сок, парче овошје или чинија салата.
