Летото само што не пристигнало, а тоа носи и некои вообичаени повреди помеѓу децата. Д-р Зафар Шамун, шеф на одделот за итна медицинска помош во болницат Бејмонт во Детроит открива со кои пет повреди децата најчесто се среќаваат во текот на летните месеци и како да се третираат.
- Повреди на главата (благи до тешки)
“Носењето кацига е многу важно, без разлика дали детето вози велосипед, скејтборд или ролери. Во итна служба треба да се јавите ако детето по падот е збунето, има гадење или повраќа, ако е летаргично или поспано или се жали на главоболки кои не поминуваат“, вели д-р Шамун.
- Топлотна исцрпеност
Д-р Шамун вели дека ова е вообичаена појава во текот на јуни и јули, што не мора да се случи на високи температури, туку во секое време.
“Децата сакаат да играат, а не да се одморат. Останете под сенка, хидрирајте се, носете крема за сончање со заштитен фактор 30 или повеќе и обновувајте ја по излегувањето од базен, езеро или море. Побарајте лекарска помош ако детето има мачнина или грчеви, повраќа, е летаргично или има температура повисока од нормалната“, предупредува тој.
- Гребнатини, осип и рани
Овие работи тешко се спречуваат, но нивното лекување е многу едноставно. Д-р Шамун напоменува раните да ги исчистите со вода,а да избегнувате триење со алкохол и водород пероксид бидејќи тоа може да го одложи заздравувањето. Нанесете тенок слој антибиотска маст на раната за да поттикнете здравување и да помогнете при болката.
- Повреди на рачниот зглоб
Детските коски се помеки од на возрасните бидејќи растат. Штитниците можат да помогнат да се спречат ваквите повреди, вели д-р Шамун. Детето треба да се однесе на лекар ако забележите оток или црвенило во зглобот или ако детето се жали на неподнослива болка.
- Изгореници
Кога поминуваме повеќе време на сонце, изгорениците се вообичаени. Лекарот советува да ги едуцирате децата да се држат настрана од скара или шпорет и да не ги допираат.Тој апелира на родителите да внимаваат рачките од тенџерето да бидат свртени нанадвор за децата да не налетаат на нив и да не добијат изгореници. Благата изгореница исчистете ја со благ сапун и вода и покријте ја со слој вазелин и стерилна газа. Пликови и големи изгореници може да бидат знак дека ви треба лекарска помош.
Што се однесува до останатите повреди, д-р Шамун вели да внимавате децата да скокаат на трамболини кои имаат заштитна мрежа, како и да го ограничите бројот на деца кои скокаат на неа одеднаш. Ако детето не е пливач, мора да носи заштитна опрема. Без разлика дали вашето дете е пливач или не, секогаш имајте го на око и обезбедете паузи за да не се исцрпи. Погрижете се да биде хидратизирано и да носи крема за сончање.
