Бескрајно чекање за поаѓање, тесни седишта во авионот, лет кој трае и трае – децата често немаат трпение за сето ова, а кога на равенката ќе се додаде и фактот дека мора да седат мирни и тивки со часови и да ги почувствуваат промените на воздушниот притисок во ушите, ова искуство се претвора во кошмар. За среќа, не мора сè да биде така црно – ви пренесуваме 12 совети за безгрижен лет со авион.
- Резервирајте поаѓање во утрински термин
Утринските летови обично се со помалку гужва, а бидејќи сите на летот се сè уште уморни – вклучувајќи ги и децата – единственото нешто што сакаат кога ќе стигнат до своите места е да продолжат да спијат.
- Избегнувајте прва класа
Иако изгледа поудобно, вашите сопатници во првата класа честопати нема да го разбираат викањето на вашето дете, па вашето патување на крајот ќе биде уште постресно. Една американска стјуардеса открива дека патниците во економската класа често повеќе ги разбираат малите деца отколку оние што седат во прва класа.
- Разговарајте со децата што да очекуваат
На децата им е полесно кога знаат што да очекуваат, а една мајка на три деца препорачува да гледате видеа на Јутјуб што го прикажува целото искуство – од пријава на багаж и издавање билети до бон-тон и безбедноста во авионот.
- Облечете се во слоеви
Мора да бидете подготвени за драстични промени на температурата во и надвор од авионот, па облечете ги децата во слоеви.
- Подгответе им изненадување
Мало дете ќе биде воодушевено од нова играчка и ќе му го окупира вниманието толку многу што ќе биде мирно некое време.
- Размислете за користење на чадор количка
Доколку патувате со количка, идеален избор секако се поедноставните, кои можат брзо и лесно да се склопат.
- Не пакувајте премногу или премалку работи
Земете доволно неопходни работи за летот со вас во кабината – од лекови до храна за детето. Но, не претерувајте, бидејќи сите овие работи ќе треба да ги влечете од авион заедно со вашите деца.
- Бидете подготвени за промени во воздушниот притисок
Ако вашето дете неодамна имало инфекција на увото или настинка, побарајте совет од лекар пред летот. Промената на притисокот на воздухот во кабината може да предизвика болка во увото. Обезбедете доволно вода за детето да пие веднаш по полетувањето и пред слетувањето. Имено, голтањето го ублажува притисокот во увото. Истото важи и за гума за џвакање, но водата е поздрав избор.
- Децата треба да седат подалеку од преминот
Седиштата покрај преминот може да бидат опасни, бидејќи стјуардесите влечат колички со храна и пијалаци. Не би било погодно доколку поради турбуленции врз вашето малечко се пролее жешко кафе или чај .
- Пазете се од бактерии
Добро дезинфицирајте ги и исчистете ги рацете на вашето дете пред јадење и, апелира една стјуардеса, не го испраќајте вашето дете во тоалет со боси нозе. Имено, подот во тоалетот не е толку чист како што мислиме.
- Бидете присебни
Нема многу што можете да направите за да го смирите патникот кој се жали на вашето дете. Сè додека се обидувате да го смирите детето и да го предупредувате да не вика или да скока, никој нема да ве критикува.
- Изберете авиокомпанија со услуги погодни за деца
Многу авиокомпании нудат различни поволности за децата – од широк спектар на омилени ТВ емисии и филмови до слушалки и грицки.
ШТО ДА ПОНЕСЕТЕ СО СЕБЕ ВО АВИОН?
- Задолжително понесете повеќе од една цуцла
- Средство за дезинфекција, марамчиња и пелени. Се препорачува по една пелена за секој час лет.
- Паметни телефони и таблети со омилените филмови или серии на вашите деца
- Слушалки
- Ликовен прибор: боички (мала кутија) и празна хартија
- Пластични кеси за ѓубре
- Вода
- Грицки: переци, крекери, јаткасти плодови и гранола барови
