Бројни истражувања докажале дека паузата од училиште и опуштањето на децата во текот на летото доведува до заборавање на одредени вештини со кои се стекнале во училиште. Затоа се смета дека повременото враќање кон книгата за време на летото е од голема корист, а особено треба да го практикуваат децата кои не постигнале добри резултати изминатата учебна година. Ако вашето дете имало проблем со читањето, не дозволувајте летниот период да помине само во игра. Читајте заедно и помогнете му да го совлада читањето. Се смета дека читањето четири до пет книги во текот на летото е бенефит за секое дете. Доколку наидувате на отпор и детето не сака ни да ја погледне книгата, тогаш оставете тој сам да си одбере што сака да чита.
Не ограничувајте се само на книги. Читајте го заедно менито во ресторан, мапата на градот, билборди и рекламни пораки, знаците на патот, натписи на облека.
Летниот одмор може да го искористите и да ги повторите и математичките вештини преку игра. Најважно е да воспоставите релаксиран однос за да не сфати детето дека ова е наредба. Бројте ги камчињата, карпите, облаците, најдете забава во секое повторување и децата лесно ќе ја прифатат вашата игра.
Бидете пример
Ако велат дека родителите се пример за децата, бидете идеалниот пример за нив. Доколку сакате да прочитаат книга за летниот одмор, тоа ќе го сторат откако ќе ве видат вас со книга во раката. Разговарајте за некоја книга и анализирајте ги личностите, раскажете ја приказната и поврзете ја со некој светски настан. Доближете ја книгата до детето, штом еднаш ја прифати, бидете сигурни дека ќе имате добри резултати.
