Летните месеци се идеален период за вадење на пелените кај детето, но за повеќето родители тој процес ретко поминува без маки. Најчесто станува збор за обиди и откажувања до попогоден момент. Иако родителите по првичниот неуспех сметаат дека детето се уште не е подготвено, педијатарката д-р Џована Армано вели дека децата најчесто се подготвени на одвикнување од пелени помеѓу 18 и 24 месеци.
“Кога таа возраст ќе се поклопи со летото, можноста детето да се одвикне од пелени е уште посигурна. Детето нема да настине, а и облеката полесно се соблекува, па детето може побрзо да научи и само да се соблече и да отиде во тоалет“, појаснува д-р Армано.
Според педијатрите, одвикнувањето од пелени најчесто се случува спонтано, а проблемите се почести ако се работи за прво, односно единствено дете, со тоа што по појавата на пелени за една употреба, времето на одвикнување е поместено.
“Факт е дека од кога се користат еднократни пелени и детето нема чувство на нелагодност и непријатност кога пелените се полни, поместено е времето кога детето останува без пелена. По правило, детето прво почнува да го контролира неволното испуштање на столица и урина во текот на денот, значи денски не носи пелени, а долго после тоа, некаде до училишна возраст може да има проблеми со контролата на отпуштање на урината навечер“, објаснуваат педијатрите.
Еден од знаците дека детето е подготвено е и денот кога не го одбива понудениот нокшир, да пелената во текот на денот е сува барем два часа, како и детето да знае и да може да следи едноставни упатства.
“Сепак, процесот на одвикнување од пелени е индивидуален и не треба да се грижите ако не успее првото лето (кога детето е помеѓу 18 и 24 месеци), но треба да продолжите да се обидувате. Обично до тригодишна возраст повеќето деца се без пелени. По четвртата година детето треба, барем во текот на денот, да биде без пелена. Често се случува децата да не можат да останат без пелена ноќе, иако немаат проблеми во текот на денот. Ако ова продолжи, треба да контактираат педијатар “, објаснува д-р Армано.
Педијатарката истакнува и дека детето не треба да се форсира многу пред 18 месец, иако понекогаш и порано може да се создаде навика.
